Sekretáriu Jerál Fretilin, Marí Alkatiri. Imajen António Gonçalves

DILI, 18 fevereiru 2020 (TATOLI)—Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri, husu ba Prezidente Repúblika, Francisco Guterres “Lú Olo” no Prezidente Partidu CNRT, Kay Rala Xanana Gusmão, atu tuur hamutuk hodi rezolve problema situasaun polítika atuál.

Primeiru, nia hatutan, Xanana tenke rezolve problema ho Prezidente Repúblika tanba nu’udar Xefe Estadu no Prezidente Partidu CNRT, Xanana Gusmão, tenke rezolve problema ho Prezidente Repúblika, Francisco “Lú Olo” Guterres, nune’e bele fasilita situasaun tomak.

“Solusaun imediata no rezolve atu iha IX Governu ida ke bele lori rai ne’e bá-oin. Nusá mak CNRT mak la-mai hasoru FRETILIN, biar mai mós sei la rezolve problema ruma. Se FRETILIN mak bá hamutuk ho CNRT no problema entre Prezidente Repúblika no CNRT la rezolvidu, bá para oho-an. Laiha lójika. Primeiru Xanana tenke rezolve problema ho Prezidente Lú Olo. Nia Xefe Estadu, Xanana Prezidente Partidu, nia tenke rezolve ho Prezidente Lú Olo. Xanana mak rezolve ho Prezidente Repúblika ne’e fasilita tebe-tebes situasaun tomak. Ita bele la’o lalais liu. Entaun, problema iha sira na’in-rua, la’ós iha ami,” dehan Marí Alkatiri ba jornalista sira, hafoin hasoru malu ho dirijente Partidu Demokrátiku (PD) iha sede CCF, Comoro, tersa (18/2/2020).

Eis Primeiru-Ministru ne’e haktuir, uluk dehan Governu minoria tanba laiha estabilidade maibé agora Governu maioritária rahun hosi laran. Afinál, tuir nia, minoritária mak laiha estabilidade ka maioritária mak laiha estabilidade.

Nia dehan, primeiru solusaun Xanana tenke rezolve problema ho Prezidente Repúblika no segundu kuandu aliansa ida ita tenke respeita malu, labele uza ema seluk hanesan instrumentu. Tuir nia, partidu ki’ik ka boot tenke trata hanesan parseiru la’ós hanesan instrumentu atu kontra de’it seluk.

Tanba, nia hateten, durante ne’e ema hotu-hotu fó kulpa de’it ba Prezidente Repúblika entaun polítku sira tenke iha konsiénsia hodi rezolve uluk problema ida-ne’e.

“Se rezolve ona ho Prezidente Repúblika, ita bá haree tanba saida mak estabilidade governativa ne’e la depende de’it ba maioria ka minoria. Depende ba koligasaun ida, maioria trata minoria sira halo nusá. Hanesan parseiru ka hanesan instrumentu, ne’e de’it,” nia dehan.

Notísia Relevante: Alkatiri-PM Taur Hasoru Malu La-ko’alia Polítika Atuál

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here