Diretór Sentru Formasaun Jurídika no Judisiáriu, Antoninho Gonçalves. Imajen/Dok.Tatoli

DILI, 04 dezembru 2019 (TATOLI) – Diretór Sentru Formasaun Jurídika no Judisiáriu (CFJJ, siga portugés), ohin, hatete SFJJ sei halo rekrutamentu ba formandu judisiál kuandu Prezidente Repúblika, Francisco Guterres Lú Olo, promulga ona dekretu lei SFJJ iha jornál da repúblika.

“Ami hetan informasaun husi Ministériu Justisa katak Konselu Ministru aprova ona dekretu lei kona-ba sentru formasaun nian, depois tenke haruka ba prezidente atu promulga, depois promulga, loke fali kursu foun ba formandu judisiál”, tenik Antoninho Gonçalves ba jornalista Tatoli iha edifísiu SFJJ, Kaikoli.

Tuir lei, nia dehan atu loke kursu foun tenke hein despasu husi Ministru Justisa. Totál formandu hamutuk ema-nain 45 kompostu husi formandu ba juiz nain 15, formandu ba prokuradór 15 no defensór públiku 15. Matéria teste mak justisa no direitu, hatene lian-portugés no tenke lisensiadu iha direitu.

Nia mós rekoñese, sentru ne’e presiza duni formadór estranjeiru nain tolu hodi forma kandidatu prokuradór. Tanba ne’e, SFJJ buka ona prokuradór internasionál, maibé ninia parte hasoru difikuldade.

Hatán ba kondisaun iha prosesu aprendizajen, nia haktuir SJFF iha sala sufisiente no iha ona planu atu loke tan sala 10, nune’e formandu husi orgaun judisiál tolu tenke ketak ketak atu lalika prejudika serbisu iha futuru. Tempu ba formasaun sei akontese durante tinan tolu nia-laran.

KM Aprova Proposta Dekretu-Lei Tolu Iha Área Justisa

Jornalista: Domingos Piedade Freitas

Editora: Rita Almeida

HAKEREK NO HATÁN

Please enter your comment!
Please enter your name here