Xefe Bankada Partidu Demokrátiku (PD), António da Conçeição ‘Kalohan'. Imajen TATOLI/António Gonçalves

DILI, 11 fevereiru 2020 (TATOLI)–Bankada Parlamentár Partidu Demokrátiku (PD) hein movimentu polítiku hosi partidu FRETILIN no partidu Congresso Nacional de Reconstrução de Timor (CNRT) ne’ebé bazeia ba desiziaun hosi líder istóriku sira.

Bankada Parlamentár Partidu Demokrátiku (PD) fó apresiasaun boot ba esforsu Prezidente-Repúblika, Francisco Guterres ‘Lú Olo’, ne’ebé rona hanoin hosi parte hotu-hotu.

Xefe Bankada Parlamentár PD, António da Conceição, kontente tanba mensajen ne’ebé líder istóriku sira hasai horisehik, sita nafatin partidu polítiku ne’ebé mak asentu iha Parlamentu Nasionál hodi hatuur saida mak interese nasionál.

PD apresia tebes bainhira Prezidente Repúblika dehan Eleisaun Antesipada ne’e últimu rekursu, la signifika lae.

“Ami hein atu partidu boot rua (FRETILIN no CNRT), ida ho figura istóriku no ida ho ita hotu nia istória, atu iha kapasidade hodi ko’alia atu hasees ita-nia diferensa pesoál, individuál hodi mós bele koloka katak ita hanaran an ita reprezenta povu. Se ita reprezenta povu ita tenke hatudu ita-nia aktu solidariedade ba saida mak sira enfrenta iha sira-nia moris loron-loron”, Xefe Bankada PD ne’e dehan liuhosi plenária Parlamentu Nasionál, tersa ne’e.

“Ba ami (PD) diálogu la’ós atu fahe kadeira. Ba ami, diálogu atu ko’alia kona-ba objeitvu Estadu tuir artigu 106 iha konstituisaun. Ida-ne’e mak ami defende. Tanba ne’e, ami serbí ne’e la’ós atu taka kuak ka sai aitonka”, nia informa.

Nia haklaken, la’ós dehan orsamentu la liu, ne’ebé hotu-hotu la buka malu, maibé tenke buka malu duni hodi fó solusaun ba inserteza polítika ne’e.

Purtantu, Xefe Bankada Parlamentár CNRT, Duarte Nunes, hateten durante ne’e ema hotu hasoru hela impase polítika ne’ebé la’o tinan ida ho balun, besik tinan rua ona.

“Ita hotu preokupa oinsá mak ita buka solusaun ba impase ida-ne’e. Bankada FRETILIN sempre dehan diálogu hodi hetan konsensu. Ami haree katak ne’e oportunidade di’ak no dalan nakloke atu ita ba buka solusaun, atu buka konsensu ba situasaun ne’ebé mak ita hasoru ne’e”, nia katak.

“Ita hotu respeita ita-nia Prezidente Repúblika ne’ebé esforsu atu rona parte hotu-hotu, konsulta hodi tenta buka konsensu hodi hola desizaun ba situasaun ida-ne’ebé ke ita hasoru ne’e”, Duarte hatutan.

Iha parte seluk, Xefe Bankada Parlamentár PLP, Cornélio Gama ‘L7’ hateten desizaun hotu iha Xefe Estadu nia liman.

“Ami hanesan partidu ki’ik hein de’it tanba to’o oras ne’e ami seidauk iha movimentu polítiku ida”, nia esklarese.

Aleinde ne’e, Vise-Xefe Bankada Parlamentár FRETILIN, Francisco Miranda Branco, afirma atu solusiona inserteza polítika mak liuhosi diálogu.

“Ami kontinua defende diálogu hodi fó solusaun ba ita-nia situasaun polítika iha rai-laran”, Branco tenik.

Nune’e mós, Deputada Bankada Kmanek Haburas Unidade Nasionál Timor Oan (KHUNTO), Olinda Guterres, dehan to’o oras ne’e seidauk iha komunikasaun kona-ba movimentu polítiku ne’e.

“Ne’e parese kabe ba ami-nia líder partidu KHUNTO nian. Ami  labele ko’alia to’o iha ne’ebá”, nia dehan.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here