DILI, 17 fevereiru 2020 (TATOLI)—Reprezentante povu iha Parlamentu Nasionál husu ba meza Parlamentu Nasionál (PN) atu fó votu pezár ba saudozu Komandante Unidade Polísia Marítima (UPM), Lino Saldanha.

Deputadu Bankada Parlamentár FRETILIN, David “Mandati” Dias Ximenes propoin ba meza Parlamentu Nasionál atu tau ajenda hodi rekoñese Komandante Lino Saldanha nia kontribuisaun iha prosesu luta ba libertasaun nasionál.

“Loron haat liubá ita lakon ita-nia Komandante Unidade Polísia Marítima, Lino Saldanha hanesan membru Organização da Juventude e dos Estudantes de Timor-Leste (OJETIL). Karik bele, meza bele konsidera para ita fó votu pezár ida iha semana ne’e. Ida-ne’e merese fó konsiderasaun tanba joven rezisténsia ninian,” Deputada David Dias “Mandati” Ximenes, propoin liuhosi plenária Parlamentu Nasionál, ohin.

Iha biban hanesan, Xefe Bankada Parlamentár Partidu Demokrátiku (PD), António “Kalohan” da Conceiçao konkorda ho proposta refere tanba Komandante Lino Saldanha bainhira idade sei joven hanesan juventude rezisténsia ida.

“Ligadu ba ida-ne’e, Parlamentu Nasionál liuliu Komisaun F ne’ebé haree ba asuntu saúde atu haree didi’ak mós prestasaun serbisu sira-ne’ebé mak la’o iha ospitál tanba ikus-ikus ne’e ita rona pasiente sira-ne’ebé maka rekorre ba iha ospitál la’ós ba atu hetan hetan esperansa ba vida maibé lakon esperansa kuandu ba ona ospitál. Ne’e situasaun real ida-ne’ebé maka ohin loron ita rona iha ospitál,” nia dehan.

Nia afirma, biar buat ida mate ne’e serteza ida ba ema hotu maibé labele hanoin dehan katak tanba tama ona iha ospitál ne’e mate ona.

“Ita rona ema barak loos mak mate no últimu mak ema rezisténsia ida tán mak mate hanesan Lino Saldanha ne’e,” nia dehan.

Entretantu, Deputada Bankada Parlamentár CNRT, Veneranda Lemos, nahohuk [konkorda] ho ideia ne’e tanba juventude rezisténsia sira presiza hetan rekoñesimentu hosi Parlamentu Nasionál liuhosi votu pezár.

“Ita tenke rekoñese Komandante Lino Saldanha nia kontribuisaun ne’ebé durante tempu rezisténsia, nia halo iha prosesu ba ukun-an ida-ne’e no mós dedikasaun profisionál hanesan Komandante UPM ninian. Ha’u mós husu atu Parlamentu Nasionál fó votu pezár ida ba nia,” nia hateten.

Deputadu Bankada Parlamentár PLP, Abel Pires, konkorda ho proposta ne’e no husu ba meza Parlamentu Nasionál atu tau iha konsiderasaun.

Hatán ba proposta ne’e, Prezidente Parlamentu Nasionál Interina atuál, Vise-Prezidente Parlamentu Nasionál, Deputada Maria Angelina Lopez Sarmento, husu ona ba tékniku sira atu tau asuntu ne’e iha ajenda.

“Se aban la biban, ita ajenda ba semana oin hodi ita fó votu pezár ba saudozu Komandante Lino Saldanha,” dehan Deputada Maria Angelina Lopez Sarmento, ne’ebé prezide meza Parlamentu Nasionál ba loron ohin nian.

Notísia Relevante: Saudozu Lino Saldanha Haloot iha Jardín Eroi Metinaro

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here