DILI, 14 fevereiru 2020 (TATOLI) – Pro-Reitór Asuntu Akadémiku UNTL, Miguel Maia dos Santos informa katak Universidade Nasional Timor Lorosa’e (UNTL) termina ona loron inkrisaun ba estudante foun sira taka ona iha 14 fevereiru, tanba universidade atu konsentra ba orientasaun ne’ebé sei realiza iha loron 18-20 fevereiru 2020.
“Loloos ne’e universidade kontra tiha ona regras inskrisaun ba estudante foun sira tanba inskrisaun loloos ne’e taka iha loron 7 fevereiru maibé kontinua loke to’o loron 13 fevereiru 2020,” Pro-Reitór Miguel Maia dos Santos informa ba Agência TATOLI iha edifisiu MESSK, Colmera, ohin.
Nia dehan inskrisaun ne’e kontinua loke tanba desizaun husi Reitór rasik uainhira simu razaun husi estudante sira. Maibé, agora atu oinsá mós universidade desidi termina inskrisaun ne’e iha loron 14 fevereiru 2020 tanba atu konsentra ba prosesu orientasaun.
Tuir nia, kada prosesu ida tenke iha ninia tempu atu termina maibé kuandu loron ne’e mak deside mak ema balun la kumpre ne’e konsekuénsia. Bele fó tempu maibé tenke hatuur hanoin ida tuir baze legál sira tanba universidsde deside taka ona inskrisaun ne’e atu fó tempu ba komisaun sira bele haree fali ba eventu importante ne’ebé sei tuir mai.
“Agora sira ne’ebé mak la konsege halo inskrisaun Universidade konsidera rezigna an. Maibé realidade husi loron ne’ebé termina sei iha nafatin estudante balun mak mai halo inskrisaun nafatin tan ne’e universidade loke no agora foin mak termina loloos,” nia haktuir.
Notísia relevante:Orientasaun Estudante Foun UNTL Sei Kanaliza Ba Fakuldade Idaidak
Jornalista : Tomé Amado
Editór : Rafy Belo
