DILI, 12 fevereiru 2020 (TATOLI)–Pro-Reitór Asuntu Akadémiku, Migual Maia dos Santos hateten, Universidade Nasional Timor Lorosa’e (UNTL) preparadu ona atu halekar ezisténsia universidade nian ba estudante foun sira iha prosesu orientasaun nia laran.
Nia hatutan, maske orientasaun ne’e hala’o iha universidade maibé kanaliza ba Fakuldade no Departementu ida-idak maibé universidade iha obrigasaun sei aprezenta mós perfil universidade enjeral ho ninia estrutura mikro no makro, vizaun misaun inklui objetivu universidade nian.
Durante orientasaun ne’e hala’o, nia hatutan, sei iha mós aprezentasaun programa sub-ordinadu husi Pro-Reitória Asuntu provedoria no Akonsellamentu,Asuntu Estudantil, no UNTL mós sei konvida GOPAC no Asosiasaun Defisiénsia sei mai ko’alia kona-ba Boa Governasaun.
“Orientasaun ne’e kanaliza ba fakuldade entaun ajênsia rua ne’ebé sei mai ko’alia topiku Boa Governasaun kabe ba Finansa ne’e mós ita sei dirizi ba Fakuldade,” dehan Miguel Maia dos Santos ba Ajênsia TATOLI iha nia knar fatin, kuarta (12/2/2020).
Tuir nia, oradór husi ajênsia rua ne’e atu mai hato’o sira-nia palestra ba estudante foun sira ne’e konfirmadu ona. Nia infroma, GOPAC sei hato’o de’it ninia palestra ba Fakuldade Direitu, Agrikultura no Fakuldade Siênsia Saude no Asosiasaun Defisiénsia sei ko’alia de’it ba Fakuldade Siénsia Sosiais.
Maibé, nia dehan, Ajênsia sira ne’e sujere tanba laiha posiblidade atu ko’alia hotu ba estudante sira iha fakuldade ida-idak, entaun sira husu tempu atu mai fali koalia ba ba estudante sira iha fakuldade seluk ho topiku topiku refere.
Jornalista : Tomé Amado
Editór : Rafy Belo