Labarik sira dansa tradisional ho lafatik. Imajen/Antonio Goncalves

DILI, 13 fevereiru 2020 (TATOLI)–Diretór Jéral Arte no Kultura, Manuel Smith Ximenes hateten, Sekretária Estadu Arte no Kultura (SEAK) identifika ona sangar haat atu halo preparasaun ba eventu jogu desportivas no konferénsia entre Ministru Juventude CPLP iha Fulan Jullu tinan ne’e.

“Sangar haat ne’ebé  SEAK indetifika ona mak sangarbLe-Ziaval, Santo Antonio, Timor Furak no We-Halik. Razaun, tanba sangar sira ne’e mak durante ne’e iha novu kriasaun no sempre kompila sira-nia talentu ho dansa kulturál klasika sira,” dehan Manuel Smith Ximenes ba Ajênsia TATOLI iha edifisiu Sekretariu Estadu Juventude no Desportu, Sional, Lecidere, Dili, kinta(13/2/2020).

Nia hatutan, materia sira ne’ebé prepara ona atu ofrese ba sangar sira ne’e kompila husi dansa kulturál ne’ebé klasiku ho planu sei koloka iha serimónia abertura.

Iha eventu kalan kulturál ne’e, nia haktuir, sei kompila mós ho sangar sira seluk inklui mós interkambiu husi bainaka sira nian tanba SEAK hetan ona sira-nia lista kontaktu no tempu badak bainhira preparasaun Governu nian fiksu ona sei halo kontaktu ho sira.

Agora, tuir nia, iha enkontru daruak ne’e seidauk ko’alia kona-ba kustu hira mak atu aloka ba kada Ministériu no Sekretáriu Estadu sira. Enkontru ne’e, sei foka liu ba manutensaun fatin sira ne’ebé mak atu hala’o desportu.

Nia hateten, iha enkontru tuir mai mak foin deskuti kona-ba orsamentu ne’ebé mak antes ne’e propoin ona. Karik, nia dehan, atu halo redusaun ho mantein ho proposta ne’ebé mak aprezenta ona atu nune’e bele fó balansu ba orsamentu ministériu hotu nian.

“To’o oras ne’e, seidauk bele halo kalkulasaun maibé kuandu proposta ne’ebé mak SEAK aprezenta mak la refleta ho montante ne’ebé propoin, obrigasaun tenke iha nafatin vontade serbisu kontinua la’o nafatin,” nia dehan.

Notisia relevante: KM Autoriza Utilizasaun Orsamentu $511.250 ba Preparasaun Jogu CPLP

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here