DILI, 12 fevereiru 2020 (TATOLI) – Governu liuhosi desizaun Konsellu Ministru, aprova ona Proposta Deliberasaun, ne’ebé aprezenta husi Ministra Edukasaun Juventude no Desportu, Dulce de Jesus Soares no Sekretáriu Estadu Juventude no Desportu, Nélio Isaac Sarmento, ba autorizasaun orasamentál ho valór $511.250, ba Organizasaun Konferensia Ministru Juventude no Desportu Komunidade País ho Lian Portugés (CPLP-sigla portugés) no mós XII Jogu Desportiva CPLP.
Timor-Leste sei sai uma-na’in ba Jogu Desportiva CPLP, ne’ebé sei realiza iha 14 to’o 24 jullu 2020 no biban ida-ne’e, Timor-Leste konfirmadu sei hatun modalidade ualu.
Sekretáriu Estadu Juventude no Desportu, Nélio Isaac Sarmento, informa iha reuniaun ezekutivu ohin, aproveita atu esplika ein termu preparasaun tékniku ne’ebé ekipa interministeriál sira hala’o hela.
Notísia Relevante: MEJD Estabelese Komisaun Interministeriál Ba Atividade Konferénsia Desportu CPLP
“Ita husu Konsellu Ministru atu aprova orsamentu iha faze dahuluk no atualiza hela informasaun kona-ba Jogu Desportiva CPLP, kona-ba saida mak agora daudaun halo ba preparativu atu sira mós bele hatene ein temu preparasaun tékniku ne’ebé ministériu balun mak envolve hotu iha laran”, tenik governante ne’e iha Palásiu Governu, kuarta ne’e.
Tuir nia, orsamentu ne’ebé hetan autorizasaun husi KM atu prepara infraestrutura, serkretariadu jogu CPLP, preparasaun atleta nasionál ninian, no mós orsamentu atu hahú halo publisidade.
“Ho ida ne’e signifika tékniku sira tenke serbisu maka’as liután no koordena malu atu ezekuta.
Nia realsa tan, eventu ne’e hanesan eventu multi-desportivu ba atleta sira ho idade 16 to’o 18 hodi reprezenta Jogu Desportiva CPLP.
Eventu internasionál ne’ebé sei realiza iha Timor-Leste ne’e, sei envolve ekipa interministeriál ne’ebé kompostu husi ministériu hitu no sekretaria estadu tolu, atu halo preparasaun estabelesimentu tékniku, ne’ebé sei lidera ba Sekretaria Estadu Juventude no Desportu
Biban ne’e, aprezenta mós muzika ofisiál husi eventu ne’e rasik ne’ebé mak hananu husi artista nasionál Maria Vitória no Gerson de Oliveira.
Tuir informasaun, partisipante ne’ebé sei partisipa iha jogu desportivu ne’e hamutuk kuaze 1000 husi CPLP.
Jornalista: Julia Chatarina
Editór: Xisto Freitas
