Kondenadu na'in-rua nu'udar membru PNTL partisipa iha kontinuasaun aúdensia julgamentu iha TDD kona-ba trajedia Kulu-hun. Imajen/Dok.TATOLI

DILI, 13 fevereiru 2020 (TATOLI) – Ministériu Públiku (MP) reprezenta husi  Prokuradór Jacinto Babo, ohin, iha nia alegasaun final kazu Kuluhun, Dili, solisita  ba Tribunal Distritál Dili (TDD) atu aplika pena prizaun ba arguido nain rua; JPA ho FMS  la bele menus husi tinan  25.

Notísia Relevante : Alegasaun Final ba Kazu Kuluhun Adia

Tuir faktu ne’ebé arrola husi MP katak, arguido na’in rua; JPA ho FMS prienxe duni akuzasaun ne’ebé mak alega husi Ministériu Públiku, liuliu ba krime omisídiu agravadu ne’ebé ameasa kadeia husi tinan 12 too tinan 25.

“Ha’u hanoin ba Ministériu Públiku la iha dúvida atu aplika pena prizaun la bele menus husi tinan 25 tanba faktu provadu hotu liu husi deklarasaun sasin, lezadu no ezame balístiku hatudu katak arguido na’in rua komete duni aktu asasinatu iha Kuluhun,” afirma Prokuradór Jacinto Babo.

Nia hateten, provadu katak arguido sira kaer duni pistola no tiru duni hodi rezulta vítima na’in tolu mate no  arguido na’in rua mós la konfesa faktu hotu no du’un ba malu de’it, maibé ba MP provadu katak sira nain rua mak komete erru ida ne’e.

MP mós konsidera arguido na’in rua hanesan ema rezisténsia no nu’udar membru Polisia Nasional Timor-Leste (PNTL), maibé haluha tiha ninia kna’ar mak atu próteze povu.

Rona tiha alegasaun final MP nian ne’e, TDD adia fila fali audiénsia ba julgamentu ba iha loron 25 fevereiru 2020, tuku 09:00 OTL, tanba defeza ida liuliu advogadu privadu Pedro Apariçio la marka prezensa iha alegasaun final ne’e.

Vítima nain-tolu ne’ebé lakon vida mak hanesan, Luis Cavin Saldanha (18), Leonaldino Eduardo Ximenes (20), ho Eric Joni Ribeiro (20).
Vítima nain-lima ne’ebé hetan kanek grave mak hanesan, Terezinha Vila Nova (23), Agrefino da Costa (19), Pinto Gama (25), Paulino de Jesus (36) no Lúcio do Carmo (30).

Audiénsia julgamentu ba kazu Kuluhun ne’e  prezide husi juiz koletivu Edite Palmira, Sribuana da Costa ho Evangelinho Belo. Ministériu Públiku reprezenta Prokuradór Jacinto Babo, no arguido sira hetan asisténsia lega husi Defensór Públiku, Eustáquio Guterres ho advogadu privadu Pedro Aparício.

Jornalista : Domingos Piedade Freitas

Editór        : Francisco Simões

HAKEREK NO HATÁN

Please enter your comment!
Please enter your name here