Plaka ESG 10 de Desembro. Imajen: Nelia Fernandes

DILI, 13 fevereiru 2020 (TATOLI)-Diretór Eskola Sekundáriu Jerál (ESG) 10 de Dezembru Comoro, Domingos Savio Gusmão informa, dezde 2017 to’o 2020 ESG 10 de Dezembro la hetan Kaderneta Eskolár to’o agora.

Diretór Savio Gusmão. Imajen: Nelia Fernandes

“Eskola sekundáriu 10 de Dezembro difikulta ba kaderneta durante 2017-2018-2019 até agora. Kaderneta ne’ebé eskola 10 dezembru la hetan kaderneta totál rihun rua resin,” Diretór Savio Gusmão ba Agênsia TATOLI, iha nia knaar fatin, Comoro, ohin.

Nia informa, uluk iha 2018 totál estudante primeiru ano 835 la hetan kaderneta, eskola fasilita de’it surat-tahan hanesan kaderneta temporaria ba sira, depois pasa ba iha segundu ano sira 835, depois estudante foun ne’ebé sira simu koloka ba primeiru ano 835 nafatin, entaun totál kaderneta 1.670 ne’e mak la hetan kaderneta iha 2018 no 2019.

“Mai kelas dua la hetan kaderneta, pasa ba iha kelas tiga la hetan kaderneta. Kelas satu ne’ebé pasa ba kelas dua agora la hetan no estudante foun kelas satu ne’ebé agora daudaun ami simu tan 835, entaun totál kaderneta ne’ebé presiza hamutuk 2.126”.

Manorin na’in ne’e aumenta, durante tinan tolu nia laran Ministériu Edukasaun, Juventude no Desportu (MEJD) la distribui kaderneta ba eskola hothotu, ho razaun krize polítiku.

“Foin daudauk iha Oitavu governu ukun ona, mas iha 2019 orsamentu ne’e iha mas orsamentu la prodús kaderneta fó ba eskola sira maibé iha 2020 orsamentu jerál do estadu la aprova tan entaun kaderneta agora ami seidauk hetan,” nia akresenta.

Nune’e nia katak, tuir informasaun MEJD fó sai iha media katak iha fevereiru kaderneta bele distribui ona ba eskola hothotu. “Tuir ami-nia haree iha Edukasaun Munisípiu Dili, iha ne’ebá mós ita haree hanesan sistema família fali iha eskola”.

“Sira-nia maluk sira ne’ebé iha eskola privada, kuandu eskola privada balun eskola públiku sira distribui kaderneta ba sira ne’e lalais, mas eskola sekundáriu 10 de dezembro ne’e difisil ita atu husu dehan fó kaderneta, ne’ebé ami husu mós to’o baruk tiha, to’o agora daudaun mós kaderneta seidauk to’o iha ami-nia liman”.

Kuandu kaderneta ne’e sira distribui ba eskola 10 de Dezembro, tuir ezekutivu ne’e katak presiza kaderneta 2.126.

Diretór ESG 10 Dezembro hatutan, eskola ne’e eskola governu ni’an, karik governu iha planu, iha programa iha dadus kompletu, sira seidauk distribui kaderneta sira hatene distribui de’it.

“Ami-nia dadus alunu ne’e ami entrega tomak iha ne’ebá kompletu, sira hatene. Tuir loloos sira distribui kaderneta ba eskola ami la presiza ba husu tan tanba eskola ne’e eskola públika, ami fó ona karta, ami hato’o ona durante iha tinan tolu nia laran. Ami husu hela kaderneta, ami hein to’o fulan ida ne’e atu ramata tan mós kaderneta ida seidauk mosu”.

“Husu ba Diretór Edukasaun Munisipiu Dili, para distribui kaderneta ne’e ba eskola hothotu para hetan, labele fó fali ba eskola balun depois eskola balun sira la liga tiha. Ida ne’e ita serbisu ne’e la imparsiál ne’e ladun di’ak,” nia konsidera.

Notísia relevante:MEJD Distribui Ona Kaderneta Eskolár Rihun 100

Jornalista : Nelia Fernandes

Editór         : Rafy Belo

HAKEREK NO HATÁN

Please enter your comment!
Please enter your name here