Diretór Jerál Planu no Parseria, Ministériu Edukasaun Juventude no Desportu (MEJD), Antoninho Pires. Imajen/Tatoli

DILI, 10 fevereiru 2020 (TATOLI)-Diretór Jéral Polítika Planeamentu Asuntu Kooperasaun, Antoninho Pires informa, iha dezembru 2019, Ministériu Edukasaun, Juventude no Desportu (MEJD) distribui ona kaderneta Eskolár rihun 100 ba Estudante Ensinu Báziku Primeiru no Segundu Siklu iha territóriu Timór laran tomak.

Tuir planu, nia hatutan, sei distribui tan kaderneta eskolár hamutuk rihun 300 atu kompleta tan sira ne’ebé seidauk iha inklui estudante eninu sekundária sira.

”Kaderneta eskolár rihun 100 ne’ebé ita foin mak fahe ne’e uluk asegura hela iha ita-nia armajen. Agora rihun 300 ne’ebé ita atu fahe tan ne’e sei iha hela prosesu produsaun nia laran. Tuir planu sei distribui mós ba estudante Ensinu Sekundária sira,” Antoninho Pires ba Agência TATOLI iha nia knar fatin, Vila Verde, segunda (10/02/2020).

Nia esplika, produsaun kaderneta eskolár rihun 300 ne’e inklui sei fahe ba estudante ensinu sekundária sira hotu ne’ebé kategoria ba grau eskolaridade.

Notísia relevante:MEJD Sei Distribui Kaderneta Eskolár

Agora, nia dehan, durasaun ba produsaun ne’e ba fulan tolu tenke finaliza ona. Maibé depende ba kondisaun ne’ebé iha inklui orsamentu ne’ebé aloka ba atu selu produsaun refere.

“Produsaun Kaderneta Eskolár ne’e tanba ita halo ona kontratu ho kompañia balun entaun ita tenke finaliza. Agora atu halo pagamentu ne’e depende ba ita-nia orsamentu ne’ebé iha. Tanba ho orsamentu duodésimu ne’e mak ita tenke kalkula,” nia esplika.

Tuir nia, agora mensalmente kuantidade hira mak rezerva atu selu ba produsaun ne’e tenke iha ona kalkulasaun maibé agora MEJD seidauk selu tanba sei iha hela prosesu produsaun nia laran.

“Maibé kuandu kompañia mak konklui ona produsaun ne’e mak foin selu dala ida,” nia hateten.

Notísia relevante:MEJD Sei Distribui Kaderneta Eskolár

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here