DILI, 12 fevereiru 2020 (TATOLI)- Fundadór JSU (João Saldanha University), João Saldanha informa katak, tinan ne’e, universidade ne’e sei aumenta dosente nasionál no internasionál balun tuir nesesidade la’ós tuir administrasaun.

“Tinan ida ne’e ami sei rekruta profesór hosi nasionál no internasionál 20 no ami rekruta tuir nesesidade katak estudante estuda progresu to’o iha ne’e ona ita tenke aumenta,  la’ós tuir administrasaun hodi hetan lais atu tenke kaer metin dehan sira ne’e vale ona, “ Fundadór JSU, João Saldanha, ba Jornalista sira hafoin ramata entrega sertifikadu ba graduadu sira, ohin, iha sala konferénsia JSU.

Dadaun ne’e tuir fundadór katak dosente hanorin tempu inteiru maka na’in 7 la’o tuir nesesidade eskola nian: “Ami importante liu maka garante katak estudante sira labele falta sala no dosente sira bele hanorin to’o rohan,” nia informa.

Kona-ba avaliasaun Ajénsia Nasionál Avaliasaun no Akreditasaun Akadémika (ANAAA), akadémiku ne’e haktuir, ANAAA uainhira halo vizita ba iha universidade refere iha tinan 2017.

“Ami kontente tanba sira rekoñese katak JSU (João Saldanha university) hanesan universidade ne’ebé iha valór adisionál hosi ANAAA rasik ne’ebé maka la hetan hosi Universidade seluk,” Fundadór João Saldanha haktuir.

Fundadór ne’e relata maske nune’e iha buat balun ne’ebé maka Universidade refere presiza hadi’a tuir observasaun hosi ANAAA rasik.

“Hosi vizita ne’e sira informa buat hotu di’ak no iha mós valór adisionál, universidade ne’e mós iha vizaun no misaun di’ak maibé presiza hadi’a fasilidade ne’ebé sei limitadu hela, “ nia haktuir.

Nune’e Fundadór ne’e mós rekoñese parte balun ne’ebé maka universidade ne’e presiza hadi’a tuir ANAAA nia observasaun.

“Dosente tenke aumenta, laboratóriu, no biblioteka tenke aumenta, estudante sira-nia espasu mós tenke aumenta, tanba ne’e maka molok ami hahú ami hakarak espasu bo’ot maibé espasu bo’ot mós dezafiu serbisu  hamutuk ho governu mós la fasil, dalaruma dada  naruk to ohin loron,” nia haklaken.

Relasiona ho kestaun sira ne’e, Fundadór Universidade João Saldanha, João Saldanha haktuir kona-ba prenxe reiezitu ne’ebé universidade refere hakarak sei lais maibé importante ida hosi universidade hakarak atu halo maka pasu konkretu.

“Prenxe rekezitu ne’e lalais, maibé importante ba ami maka pasu ida ne’ebé ami halo ne’e konkreta katak kami hakarak konvensidu, motivasaun aas no hakarak liu hosi pasu rigorozu JSU atu nune’e kada pasu ka étapa ida ne’e ami bele dehan ona katak sira bele,” João Saldanha tenik.

Notísia relevante:JSU Gradua Estudante Programa Baze Na’in 20

Jornalista: Nelia Borges

Editór     : Rafy Belo

HAKEREK NO HATÁN

Please enter your comment!
Please enter your name here