Vise-Ministru Administrasaun Estatál, Abílio José Caetano. Imajen TATOLI/Egas Cristóvão

DILI, 12 fevereiru 2020 (TATOLI) – Ministru Administrasaun Estatál ein ezersísiu, Abílio José Caetano, aprezenta Projetu Dekretu Governu kona-ba alterasaun daruak husi Dekretu-Lei númeru 03/2006 16 marsu, ne’ebé mak aprova Estatutu Administrasaun Munisipál no Grupu Tékniku Interministériál ba Dezentralizasaun Administrativa.

Hafoin reuniaun ezekutivu, governante ne’e esplika alterasaun ne’e sei asume konjuntu medida konkreta ba konkretizasaun prosesu Dekonsentrasaun no Desentralizasaun Administrativa.

Nune’e mós, partikularmente haree ba kriasaun no estabelesimentu husi Poder Lokál autarkia, dezignadamente ba revizaun kuadru jurídiku organizasaun no funsionamentu Autoridade Munisipál no Admintrasaun Munisipál.

Notísia Relevante: Tinan 2020, Governu Hakarak Hakle’an Prosesu Desentralizasaun Administrativa

 “Ohin Ministériu Administrasaun Estatál (MAE) aprezenta Dekretu-Lei ne’ebé iha relasaun ho polítika Desentralizasaun Administrativa. Alterasaun ne’e atu fó biban ba Governu hodi haree oinsá ita atu estabelese estrutura naton iha munisípiu sira. Estrutura ne’ebé bele fó atendimentu ba ita nia komunidade no haree oinsá ita hakbesik governasaun ne’e ba kraik”, tenik Abílio José Caetano iha Palásiu Governu, kuarta ne’e.

Atuál Vise-Ministru Administrasaun Estatál ne’e esplika, estrutura ida-ne’e hafoin aprovasaun Dekretu-Lei mak sei implementa hanesan estrutura ida ne’ebé mak prepara bainhira estabelese ona Podér Lokál.

“Podér Lokál tuir ita nia Konstituisaun artigu 72, katak iha ezekutivu ida ne’ebé mak eleitu no mós iha ninia Asembleia Munisipál. Tanba ne’e mak bainhira to’o estabelesimentu Podér Lokál ita presiza prepara estrutura hodi prienxe ho rekursu umanu ne’ebé kapasitadu hodi hein bainhira munisípiu ne’e iha ona no Podér Lokál, sira kontinua servisu ho Prezidente Munisípiu ne’ebé eleitu. Tanba ne’e mak ohin MAE propoin alterasaun daruak ba Dekretu-Lei 3/2006”, nia akresenta.

Nia subliña, Lei Podér Lokál no Desentralizasaun Administrativa hanesan lei ne’ebé vitál tebes atu Governu bele implementa.

“Lei ida-ne’e iha ona Parlamentu, ita hein lejislatura ida-ne’e bele halo apresiasaun globál, nune’e bele lori fali ba Prezidente Repúblika”, nia dehan tan.

Preparasaun Polítika Desentralizasaun 

Konseitu desentralizasaun rasik la’ós atu loke instituisaun barak iha munisípiu, maibé atu hakbesik Governu Sentrál ba Povu, tanba ne’e, presiza hakbiit liután rekursu umanu sira iha área administrasaun no jestaun.

Dezde tinan-2003 to’o agora, Governu halo preparasaun ba polítika desentalizasaun no halo sosializasaun molok implementa polítika desentralizasaun, bazea ba Konstituisaun RDTL artigu 72 no Planu Estratéjiku Dezenvolvimentu Nasionál (PEDN).

Artigu 72 konstituisaun RDTL hakerek kona-ba podér lokál iha alínea 1 haktuir, sei harii kbiit lokál ho ema koletivu iha rai-laran ne’ebé iha órgaun reprezentativu, ho knaar atu organiza partisipasaun sidadaun idak-idak nian, kona-ba solusaun problema rasik iha sira-nia komunidade no atu promove dezenvolvimentu lokál no la afeta partisipasaun Estadu nian.

Nune’e mós, iha alínea 2 husi artigu hanesan hateten, organizasaun, kompeténsia, funsionamentu no kompozisaun órgaun kbiit lokál nian sei define tuir lei.

Antes ne’e, Governu anteriór fó ona delegasaun kompeténsia ba munisípiu haat hanesan Baucau, Bobonaro, Dili no Ermera.

Iha PEDN Kapítulu IV haktuir, desentralizasaun nia prinsípiu maka oinsá atu dezenvolve setór privadu, promove instituisaun sira ne’ebé forte no lejítimu iha nasaun tomak ho estável no mós iha oportunidade partisipasaun demokrátika.

Iha tinan-2016, Governu kontinua polítika desentralizasaun maibé la liuhosi eleisaun munisipál tanba lei laiha, ne’e duni Governu halo esforsu hodi kontinua preparasaun mak iha Dekretu Lei númeru: 3/2016 ne’ebé alteradu ho Dekretu Lei Nú. 9/2018, ne’ebé mensiona katak preparasaun sei liuhosi Deskonsentrasaun Administrativa, katak tau munisípiu hanesan administrasaun direta hosi Estadu.

Desentralizasaun Institusionál, hatúr munisípiu nu’udár administrasaun indireta hosi Estadu, no, Desentralizasaun Territoriál hatúr munisípiu sira nu’udár Governu lokál ida ho ninia Asembleia Munisipál.

Rezolusaun Apoiu Polítika Desentralizasaun

Iha loron 5 marsu 2019, VIII Governu Konstitusionál liuhosi enkontru Konsellu Ministru, aprova rezolusaun ida hodi apoiu polítika ba implementasaun desentralizasaun administrativa ba munisípiu sira seluk.

Ministériu Administrasaun Estatál submete rezolusaun ne’e hodi kesi ministériu ne’e ho ministériu relevante, hodi fó apoiu ba prosesu desentralizasaun hodi bele la’o ho efetivu, nune’e tinan haat to’o lima mai bele atinje objetivu podér lokál iha munisípiu sira tuir artigu 72 Konstituisaun.

Nune’e mós, iha aprezentasaun orsamentu 2020, Primeiru-Ministru, Taur Matan Ruak, afirma iha tinan ne’e, Governu prevee ona orsamentu atu fortifika polítika desentralizasaun administrativa.

Ba inisiativa ida-ne’e, Governu prevee ona millaun $3, ne’ebé destina atu prenxe vaga  sira ne’ebé ezistente iha mapa pesoál  husi Autoridade Munisipál  no administrasaun munisipál sira.

Aleinde ne’e, prevee mós millaun $9,4, ne’ebé destina  atu fó apoiu ba projetu oin-oin  ne’ebé Autoridade Munisipál  no Administrasaun Munisipál sira promove iha ámbitu Planu Dezenvolvimentu Integradu Munisipál (PDIM).

Jornalista: Julia Chatarina

Editór: Xisto Freitas

 

HAKEREK NO HATÁN

Please enter your comment!
Please enter your name here