Primeiru-Ministru, Taur Matan Ruak. Imajen/Antonio Goncalves

DILI, 15 janeiru 2020 (TATOLI)–Primeiru-Ministru (PM), Taur Matan Ruak, afirma iha tinan 2020 Governu prevee ona orsamentu atu fortifika polítika desentralizasaun administrativa, ne’ebé antes ne’e Governu anteriór inisia Lei Podér Lokál atu hahú prosesu desentralizasaun maibé Prezidente Repúblika veta iha setembru 2017.

Razaun fundamentál Prezidente Repúblika veta lei ne’e momentu ne’ebá tanba dúvida ho kontrolu Governu sentrál bele lakon tiha ba administradór sira.

“Ha’u hakarak aproveita biban ida-ne’e atu apela mós ba apoiu Parlamentu Nasionál  ba medida orsamentál sira ne’ebé Governu propoin kona-ba atu hakle’an prosesu desentralizasaun administrativa”, tenik PM Taur iha aprezentasaun Proposta Lei Orsamentu Jerál Estadu (OJE) 2020 foun iha diskusaun jeneralidade loron dahuluk, iha plenária Parlamentu Nasionál, kuarta ne’e.

Nia deskreve, inisiativa ida-ne’e Governu prevee ona millaun $3, ne’ebé destina atu prenxe vaga  sira ne’ebé ezistente iha mapa pesoál  husi Autoridade Munisipál  no Administrasaun munisipál sira.

Nune’e, prevee millaun $9,4, ne’ebé destina  atu fó apoiu ba projetu oin-oin  ne’ebé Autoridade Munisipál  no Administrasaun Munisipál sira promove iha ámbitu Planu Dezenvolvimentu Integradu Munisipál (PDIM).

“Governu kontinua halo tuir kompromisu polítiku no konstitusionál  atu implementa  desentralizasaun administrativa. Ba ida-ne’e, define ona kalendáriu ida-ne’ebé prevee katak durante tinan ne’e sei hahú prosesu avaliasaun ida kona-ba ezisténsia kondisaun mínima atu estabelese autárkia munisipál sira”, nia akresenta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here