UPF ho TNI halo operasaun hamutuk iha liña fronteira terrestre. Imajen/Eugénio Perereira

BATUGADE, 11 fevereiru 2020 (TATOLI)- Kuda hitu (7) ne’ebé primeiru Governu Konstitusionál liu husi Ministériu Interiór entrega ba Unidade Patrullamentu Fronteira (UPF) iha tinan 2004 too 2005, oras ne’e, mate hotu ona. Tanba ne’e, Komandante UPF Superintendente, João Belo dos Reis, sujere atu governu bele sosa hikas kuda 10 no asu  (anjing pelacak) hodi bele ajuda servisu UPF.

Notísia Relevante : UPF Apreende Mina Ilegál Tonelada 37, Karreta Tolu no Motor Ualu

Kuda hitu ne’ebé mate ona ne’e, uluk oferese husi Rogério Tiago Lobato bainhira assume kargu nu’udar Ministru Interiór.

Komandante UPF,Superintendente João Belo dos Reis.

“Kuda 7 ne’e katuas hotu ona, tanba ne’e mate. Agora ami husu ba komandu atu sosa tan kuda foun 10  no presiza sosa tan asu matenek para bele buka tuir hodi identifika ema sira ne’ebé lori sasán kontra bandu ka droga tama sai ita nia territóriu liuhusi fronteira terrestre,” hateten Superintendente, João Belo ba Ajénsia TATOLI, ohin, iha Kuartél Jerál UPF, Batugade.

 “Kuda ida ho diviza ajente xefe ne’ebé ita nia eis Ministru Interior, José Agostinho “Somoctxo” promove ba ajente xefe ne’e foin mate iha fulan kotuk, ami hotu hanoin no hadomi tebes hodi hakoi nia ho di’ak,” tenik João Belo.

João dehan, prezensa kuda sira ne’e durante ne’e ajuda membru sira tula sasán, inklui halo kontrolu iha postu fronteira sira ne’ebé izoladu ho area sira ne’ebé la asesu ba estrada.

 Proposta sosa kuda ne’e rasik, Komandante João aprezenta ona ba Komandu PNTL no Ministru Interiór Interinu, Filomeno da Paixão de Jesus, ne’ebé promote sei prevee orsamentu.

 Monta Tan Postu UPF Foun 13

Iha parte seluk, João Belo dehan, daudaun ne’e parte UPF aprezenta ona proposta ba Komandu PNTL hodi hato’o ba Governu Timor-Leste atu monta tan postu UPF foun 13 iha liña fronteira sira.

“Ami presiza mós aumenta pesoál UPF no aumenta tan postu foun 13 iha fronteira hodi haforsa servisu la’o di’ak liután iha postu 29 ne’ebé monta antes ona,” tenik nia.

Nia dehan, tuir planu postu hira ne’e atu konstrui iha tinan ne’e, maibé tanba Orsamentu Jerál Estadu (OJE) 2020 sumba tiha presiza hein too orsamentu foun iha maka foin bele ezekuta.

UPF iha membru hamutuk na’in 365 ne’ebé kolokadu iha Aeroportu Internasionál Prezidente Nicolau Lobato, Comoro, Aeroportu Kay Rala Xanana Gusmão, no postu fronteira integradu sira no sei monta tan membru iha Aeroportu Internasionál Rota do Sándalu Oe-cusse.

Iha parte seluk, UPF mós iha ona drone hamutuk 12 no kamera CCTV hodi kontrola ema sira ne’ebé halo atividade tama sai iha dalan ilegál iha fronteira.

Tuir João dehan, kamera drone ne’e ajuda tebes servisu UPF nian hodi deteta ema ilegál sira nia atividade iha ai laran.

Iha parte seluk, João Belo apresia durante ne’e Ajénsia Dezenvolvimentu Nasionál (ADN) kada tinan reabilita infraestrutura kuartél jerál UPF iha Batugade, hadi’a kazerna UPF no apoiu reabilita postu balun iha fronteira sira.

Postu UPF iha Kova, Bee Lulik Kraik, Postu Nipani no Postu Kruz Oe-cusse dook husi estrada no seidauk asesu ba liña eletrisidade.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here