Membru Unidade Polisia Fronteira (UPF) prende hela mina ilegál iha fronteira Batugade.Imajen/Media PNTL

DILI,19 dezembru 2019 (TATOLI)-Tuir relatóriu servisu hosi Polisia Unidade Fronteira (UPF), relata hahú fulan janeiru to’o dezembru 2019,  konsege apreende (foti) ona mina ilegál hamutuk tonelada 37, karreta tolu no motor ualu hosi Atambua Indonézia mai Timor-Leste.

Komandante Unidade Polisia Fronteira (UPF), Superintendente, João Belo dos Reis, relata atividade apreensaun ne’e lao ho susesu tanba hetan koordeansaun servisu ida di’ak entre Diresaun Nasionál Servisu Migrasaun Fronteira no Autoridade Aduaneira/Alfándega, Munisípiu Bobonaru,Covalima no Rejiaun Autónomu Espesiál Oé-Cusse Ambenu (RAEOA).

 “Totál krime ilegál sira liuliu lori mina-rai no gazolina ami rejistu 37 tonelada mak ami prende(foti), no karreta tolu, motorizada ualu 8 inklui sigarru ilegál sira ho ró ilegál tolu ami prende hotu,”informa Superintendente Polisia, João Belo dos Reis ba jornalista iha Komandu Jerál PNTL, Caicoli Dili, kinta(19/12).

Tuir lei katak, UPF tenke entrega kedas autór no sasan ilegál hirak ne’ebé apreende ba Komandu PNTL Munisípiu Rua ne’e ho RAEOA hodi prosesa tuir lei atu selu multa ba kofre estadu.

Nia dehan, lorloron UFP ho Alfándega sempre  prende kombustivél ilegál hanesan, mina-rai, gazolina, gazonutu iha área tasi Atapupu, Atambua lori mai Beakou,  Postu Administrativu Atabae,  Munisípiu Bobonaro tanba importa sein dokumentu hosi Sidadaun Indonézia no Timor-oan rasik.

Atividade tranzasaun ilegál kontinua akontese iha tasi-laran no ra-maran,   maibé  UFP infrenta difikuldade ida  maka falta ró patrullamentu hodi afeita ba membru polisia sira atu halo kontrollu.

Tanba ne’e, tuir planu iha tinan 2020, PNTL husi Unidade Fronteira ne’e aprezenta ona planu ba governu  hodi aumenta númeru UPF inklui  monta kamera Closed Circuit Television (CCTV) no uja mós kamera drone hodi deteta no kontrola atividade ilegál iha  liña fronteira.

“Ita planu mós sei monta tan CCTV (Closed Circuit Television) iha postu Mota Masin, Sakato inklui mós atu tau tan postu 10 iha fronteira liu-liu iha zona sira ne’ebé ami konsidera hanesan ema ilegál sira tama barak,”Nia hateten.

Komandante UPF ne’e garante depois montajen ekipamentu eletróniku hirak ne’e sei tulun membru sira atu halo patrullamentu ho di’ak no másimu liután.

Relasiona ho selebrasaun natal no tinan foun 2020, UPF koordena ona Autoridad Aduaneira, Servisu Migrasaun no Servisu Intelijénsia halo pasa-revista maka’as hodi prevene ai-moruk droga no sasan ilegál seluk tama iha territóriu.

Iha parte seluk, Superintendente, João Belo dos Reis, esplika iha semana kotuk, UPF, PNTL  inklui (BNN) Badan Narkótika Nasionál) Indonézia prende sidadaun Timoroan ida ne’ebé tenta hatama ai-moruk droga mai Timor-Leste iha área Fronteira Motain.

Suspeitu ne’e rasik dadaun ne’e,  asegura ona iha Komandu Munisípiu Bobonaru  hodi  submete ba prosesu investigasaun hosi polisia investigasaun hodi hatene loloos identidade hosi suspeitu ne’e rasik.

Antes ne’e,  iha loron 30 Outubru liubá, Polisia no Alfándega apreende mós ai-kameli ilegál lubuk ida ne’ebé autór balun husi Suku Guda Postu Administrativu Lolotoe, Bobonaru atu lori bá Atambua-Indonézia.

Jornalista : Eugénio Pereira

Editór:Francisco Simões

1 KOMENTÁRIU

  1. Ho haraik an ho laran luak atu sujere deit ba editor ka hakerek nain katak tenke hakerek hlo didiak no komprende vokabulariu Apreende no Prende.hodi nune lable mosu duvidas ba audensia ka publiku.
    Obrigdu wain

HAKEREK NO HATÁN

Please enter your comment!
Please enter your name here