Eskola Sekundáriu Tékniku Vokasionál (ESTV-Ekonomia no Komérsiu). Foto TATOLI: Nelia Fernandes

DILI, 11 fevereiru 2020 (TATOLI)-Diretór Eskola Ensinu Sekundária Téknika Vokasinál-Eskola Ekonomia no Komérsiu (ESTV-EEC) Becora, Aderito Luís da Costa informa, durante nia mandatu iha tinan tolu nia laran, eskola ne’e seidauk asesu ba kaderneta eskolár.

“Ha’u-nia mandatu durante iha tinan tolu nia laran ne’e, kaderneta eskolár husi Ministériu Edukasaun Nasionál ka Munisípiu seidauk halo distribuisaun kona-ba kaderneta eskolár mai ami-nia eskola. Ha’u la hatene katak kaderneta eskolár ne’e iha ka lae mak Ministériu Edukasaun la fó mai mai,” Aderito Luis da Costa, dehan ba Agência TATOLI iha nia knaar fatin, Becora, ohin.

Nia hatutan, durante tinan tolu nia laran ba kotuk mós hanesan entaun kada tinan eskola sempre halo rekapitulasaun valór ba estudante sira liuhusi surat-tahan baibain de’it tanba kaderneta eskolár laiha.

“Kaderneta ne’e iha momentu 2007 ka 2008 ne’e iha karik, ha’u ladun hatene. Foin lalais ne’e, nia formatu sira foin lori mai no CAC mós mai investiga hotu. Ne’e ami deklara ami-nia an katak ami la hetan kaderneta eskolár to’o ohin loron ami la hetan,” nia esplika.

Durante ne’e, nia informa, parte eskola esforsu an hodi troka kaderneta eskolár hodi uza de’it kaderneta ne’ebé imprime iha surat-tahan entaun estudante sira-nia inan-aman mai kestiona kona-ba asuntu ida ne’e.

“Ami hatán dehan la’ós eskola kaderneta iha mak la fó ba iha oan sira, lae. Kaderneta eskolár ne’e, ministériu edukasaun mak la haruka mai. Entaun, inan-aman sira mós nonook,”  nia hateten.

Nia haktuir, asuntu ida ne’e nia relata ona  no husu ba Ministériu Edukasaun liu-liu ba Ministra Edukasaun atu fó orientasaun lalais ba sira-nia ema iha Ministériu Edukasaun Nasionál ka iha Munisípiu atu bele distribui lalais kaderneta eskolár ida ne’e tanba eskola teknolojia vokasionál ne’e presiza tebes kaderneta.

Notísia relevante:MEJD Distribui Ona Kaderneta Eskolár Rihun 100

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here