iklan

EKONOMIA, HEADLINE

IPG sei Haruka Amostra Module AGI 185 ba Analiza iha Laboratóriu EUA

IPG sei Haruka Amostra Module AGI 185 ba Analiza iha Laboratóriu EUA

Ekipa IPG retrieval ka kolleta module AGI ba peskiza mina no gás iha munisípiu Baucau no Viqueque. Imajen/IPG.

DILI, 10 fevereiru 2020 (TATOLI) – Diretór Investigativu Jeolojia, Insitutu Petroléu no Jeolojia (IPG, sigla portugés), Elias da Silva Cabral, informa IPG sei haruka amostra module Amplified Geochemical Imaging (AGI) hamutuk 185 ba Estadu Unidu Amérika (EUA) atu analiza iha laboratóriu Newark Delaware USA.

“Amostra module AGI ba peskiza mina no gás iha Munisípiu Baucau no Viqueque ne’e daudaun iha hela faze atu shipping ba rai-li’ur, ami hasoru malu ho ekipa Alfándega, Aviasaun Sivíl nian no Kuarentena hodi halo inspesaun ba amostra atu haruka ba Amérika atu analiza”, Diretór IPG ne’e  ba Ajénsia TATOLI, iha knaar fatin Elemloi, ohin.

Diretór Investigasaun Jeolojia Institutu Petróleu no Jeolojia, Elias da Silva Cabral.

Diretór IPG dehan amostra module AGI 185 ne’e ho tipu gás no solidu (padat), ne’ebé ba module gás (amostra) ne’ebé foti iha Atalele-Viqueque nian, labele haruka liuhusi aviaun, maibé tenke liuhosi Atapupu-Indonézia hodi lori ho ró.

Hodi dehan amostra ba module AGI ba peskiza mina no gás hamutuk 185 sei lori ba laboratóriu iha Amérika no prosesu to’o iha ne’ebá kuaze semana rua to’o tolu.

“Kona ba kustu atu selu ba laboratóriu ne’e seidauk iha informasaun klara, maibé totál ba amostra ho module AGI no ekipamentu inklui Lab ne’e ita analiza kuaze kustu rihun $260”, adianta.

Nune’e, Diretór Elias da Silva Cabral adianta daudaun iha ona prosesu inspesaun, kuandu buat hotu la’o di’ak sei haruka sai iha semana ida ne’e.

Hodi hatete, IPG haruka amostra module AGI mina no gás ba iha EUA (Newark Delaware USA) tanba kuaze nasaun hotu iha fatin barak hala’o estudu ba AGI tenke bá Amérika hotu.

“Rezultadu sei sai iha maiu, se tarde liu iha juñu tinan 2020, no karik iha rezultadu analiza mak di’ak IPG sei presiza halo ground survey ba área sira ne’ebé mak identifikadu atu hatene kle’an liu kona-ba ninia sistema petróleu ne’ebé mak iha rai okos”, afirma.

Entretantu, IPG finaliza ona atividade retrieval ou kolleita AGI ne’ebé utiliza ba peskiza mina no gás iha Munisípiu Baucau no Viqueque iha bloku tolu ho susesu.

Module AGI ne’e kolleita hahú iha 4 to’o 21 janeiru 2020, hanesan husi bloku A ne’ebé kompostu husi Postu Administrativu Venilale, Ossu-Viqueque, Vemasse ho totál module ne’ebé instala hamutuk 36, bloku B kompostu husi Postu Administrativu Watulari, Quelicai, Baucau ne’e ekipa IPG instala module 73 no bloku C ho lokalidade Laga no Baguia ho totál module 32, maibé module ida mak nehek estraga.

Atividade seluk maka ekipa halo mós instalasaun module ba posu abandona rua iha Alianbata iha module 22, posu Betano iha 22 no kondisaun di’ak hotu.

Durante peskiza ba atividade iha terrenu hahú husi prosesu instalasaun loron 21 no rekolla fali iha loron 21 ne’ebé ho totál kompletu loron 42.

Atividade peskiza ho ekipamentu AGI hahú instalasaun iha (13/12/2019) ho nia objetivu atu hatene ezisténsia idrokarbonetu iha rai-okos, atividade kalibrasaun ba posu abandona no amostra mina no gás.

AGI nu’udar teknolojia moderna ne’ebé utiliza ba esplorasaun jeokímika hodi identifika gás no mina, liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Estudu ne’e nu’udar kontinuasaun ba estudu sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Notísia relevante : IPG Finaliza ona Kolleita Module AGI ba Peskiza Mina no Gás

Jornalista : Florencio Miranda Ximenes

Editora : Maria Auxiliadora

iklan
iklan

Leave a Reply

iklan
error: Content is protected !!