Ekipa IPG retrieval ka kolleta module AGI ba peskiza mina no gás iha munisípiu Baucau no Viqueque. Imajen/IPG.

DILI, 21 janeiru 2020 (TATOLI) – Institutu Petróleu no Jeolojia (IPG, sigla portugés) finaliza ona atividade retrieval ou kolleita module Amplified Geochemical Imaging (AGI) ne’ebé utiliza ba peskiza mina no gás iha Munisipiu Baucau no Viqueque.

Koordenadór Kampu Peskiza AGI no Xefe Unidade Petróleu no Gás, Joanico Pires, hatete rekollimentu AGI iha bloku tolu IHA munisípiu rua ne’e ho susesu.

Module AGI ne’e kolleita hahú iha 4 to’o 21 janeiru 2020, hanesan husi bloku A ne’ebé kompostu husi Postu Administrativu Venilale, Ossu-Viqueque, Vemasse ho totál module ne’ebé instala hamutuk 36, bloku B kompostu husi Postu Administrativu Watulari, Quelicai, Baucau ne’e ekipa IPG instala module 73 no bloku C ho lokalidade Laga no Baguia ho totál module 32, maibé module ida mak nehek estraga.

“Daudaun hein para atu lori bá analiza laboratóriu tanba ekipa kolleita fali ekipamentu hirak ne’e ho kondisaun di’ak hotu no kompletu hanesan antes ne’e instala, maibé iha de’it module ida mak nehek estraga”, Joanico Pires ba TATOLI via mídia sosiál, ohin.

Nune’e, solusaun kona-ba module ne’ebé nehek han ne’e, ekipa IPG sei halo korrelasaun dadus no interpolasaun (introdús) dadus jeokímiku  no jeolójiku hodi bele reprezenta data ba pontu ne’ebé nehek estraga ne’e.

Joanico Pires adianta durante estudu module AGI hahú husi prosesu instalasaun no kolleita fali ekipamentu hirak ne’e hetan apoia másima husi autoridade lokál no abitante iha munisípiu rua ne’e.

“Ami agradese tebes tanba ekipamentu hirak ne’ebé ekipa IPG instala ba ne’e la hetan estraga husi komunidade, ne’e hatudu katak kolaborasaun autoridade lokál ho ekipa IPG di’ak tebes, nune’e ekipamentu hirak ne’e tékniku ba kolleita fali kompletu no laiha estraga husi komunidade no animál”, Joanico agradese.

Durante peskiza ba atividade iha terrenu hahú husi prosesu instalasaun loron 21 no rekolla fali iha loron 21 ne’ebé ho totál kompletu loron 42.

Atividade seluk maka ekipa halo mós instalasaun module ba posu abandona rua iha Alianbata iha module 22, posu Betano iha 22 no kondisaun di’ak hotu.

Objetivu husi kalibrasaun ba posu abandona maka atu hatene fonte husi mina refere no mós atu halo komparasaun ho rezultadu anomaly bloku A, B no C.

Nune’e, Ekipa IPG semana ne’e lori mai iha laboratóriu hodi analiza module AGI durante fulan tolu to’o haat.

“Analiza hotu tiha hafoin halo interpretasaun ba rezultadu anomaly map husi rezultadu interpretasaun anomaly map maka foin define área ne’ebé iha indikasaun mina no gás bazeia ba anomaly map”, katak.

Atividade peskiza ho ekipamentu AGI hahú instalasaun iha (13/12/2019) ho nia objetivu atu hatene ezisténsia idrokarbonetu iha rai okos, atividade kalibrasaun ba posu abandona no amostra mina no gás.

IPG halo peskiza mina no gás utiliza ekipamentu ou teknolojia modernu ho naran AGI hodi identifika ezisténsia mina no gás iha munisípiu Baucau no Viqueque.

Ekipamentu AGI nu’udar teknolojia moderna ne’ebé utiliza ba esplorasaun jeokímika hodi identifika gás no mina, liuhusi migrasaun microseepage, indika ho kímika analítika husi C2 to’o C20 iha fatuk jeradór ou fatuk rezervatóriu.

Estudu ne’e nu’udar kontinuasaun ba estudu sistema petróleu ne’ebé hala’o iha área refere iha 2016 to’o 2017 no hatudu rezultadu ne’ebé di’ak ba konsentrasaun petróleu no gás.

Notísia relevante : IPG Koleta Fali ona Module AGI iha Bloku A

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here