Ministra Edukasaun, Juventude no Desportu Dulce de Jesus Soares .Imajen/TATOLI

DILI, 07 janeiru 2020 (TATOLI) – Deputadu Domingos Lopes Lemos husi bankada CNRT (Conselho Nacional da Reconstrução de Timor) preokupa ho kaderneta eskolár estudante sira husi ensinu báziku primeiru no segundu siklu ne’ebé la asesu durante tinan rua resin tanba la fasilita husi Ministériu Edukasaun, Juventude no Desportu (MEJD).

“Ami halo observasaun ba eskola ensinu báziku primeiru no segundu siklu iha territóriu Timor-Leste kuaze estudante barak mak seidauk iha kaderneta eskolár. Inan-aman sira to’o agora labele asesu ba progresividade oan sira nian,” Deputadu Domingos Lopes Lemos dehan ba Ministra Dulce de Jesus Soares uainhira halo audiénsia ho Komissun G iha Parlamentu Nasionál, ohin.

Hatan ba preokupasaun ne’e, Ministru Dulce de Jesus hateten katak sei toma ona konsiderasaun ba problema kadernerta eskolár ne’e. “Fevereiru tinan ne’e ita sei tama iha faze distribuisaun kaderneta eskolár ba eskola hotu iha territóriu laran tomak tanba orsamentu ne’e ami aloka tiha ona iha 2019. Agora daudaun iha ona faze impresaun.

Tuir governante ne’e katak MEJD prepara ona kaderneta eskolár rihun 300 resin mak sei distribui. Signifika ho totál kaderneta ne’ebé prepara bele rezolve ona problema estudante sira nian no bele apoiu ona parte eskola atu responde preokupasaun inan-aman sira nian.

Notísia relevante:MEJD Sei Rezolve Problema Kaderneta Eskolár

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here