DILI, 03 fevereiru 2010 (TATOLI)—Lutadór MMA Lafaek Timor-Leste, ohin, to’o tiha ona iha Jakarta-Indonézia atu luta (fight) liuhusi klase flyweight iha eventu internasionál ONE Championship; FIRE & FURY ne’ebé sei realiza iha Stadiun Istora Senayang Jakarta, Indonézia, iha sesta (07 fevereiru 2020).

Iha eventu internasionál refere, lutadór MMA Lafaek, Abro Fernandes ne’ebé maihusi Suku Luru, Aldeia Abere, Uma-Lisan Lotu Roma ne’e sei kontra lutadór Indonézia, Eko Priandono. Iha Jakarta, daudaun ne’e, nia halo hela preparasaun no prontu atu luta dala ida tan iha manu-futu fatin.

“Ha’u prontu no preparadu tiha ona. Razaun tanba ha’u prepara tinan ida ba fight ida ne’e no ha’u foin manan iha fulan outubru. Ha’u-nia adversáriu ne’e, tinan ida la fight,” Pioneru Federasaun Muaythai no MMA Lafaek Timor-Leste, Abro Fernandes, dehan ba Agênsia TATOLI liuhusi rede sosiál, ohin.

Nia infroma, ninia adversáriu Eko Priandono iha ninia vertude (kelebihan) tuku malu iha leten (stand up fight) maibé nia mós fiar-aan tanba nia mós iha vertude iha tuku xave malu (ground fight) ne’ebé di’ak liu nia adversáriu.

“Kona-ba ha’u-nia adversáriu Eko Priandono hanesan lutadór ida ne’ebé kompletu maibé ha’u haree leet uitoan de’it ha’u bele tama ho lais atu bele na’uk valór. Ha’u fiar-aan no iha esperansa atu manan ho ha’u-nia kapasidade rasik,” nia dehan.

Tanba ne’e, nia apela, ba timoroan sira ne’ebé hela iha Timor-Leste no namkari iha rai-rai atu fó apoiu orasaun ba lutadór MMA Lafaek Timor-Leste, Abro Fernandes, atu bele manan tanba nia lori Timor-Leste nia naran no lori Timór ba mundu.

Nia tatoli atu timoroan sira bele akompaña fight ida ne’e liuhusi transmisaun direta iha televizaun privada Surya Citra Televisi (SCTV), iha sesta (07/2/2020) tuku 17.00 otl.

Notísia relevante:Abro Fernandes: “Ha’u Prontu Atu Manán”

Jornalista : Cancio Ximenes

Editór   : Rafy Belo

HAKEREK NO HATÁN

Please enter your comment!
Please enter your name here