Primeiru-Ministru, Taur Matan Ruak. Imajen TATOLI/ Egas Cristovao

DILI, 06 fevereiru 2020 (TATOLI)–Primeiru-Ministru (PM), Taur Matan Ruak preokupa Prezidente Autoridade Rejiaun Administrativa Espesiál Oé-Cusse Ambeno (RAEOA), seidauk halo nomeasaun ba Sekretáriu Rejionál sira hodi kompleta estrutura foun. 

Preokupasaun ne’e Taur hato’o hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Pratikamente seidauk iha nomeasaun. Tanba ne’e, ha’u preokupa no ha’u mós husu atu Prezidente RAEOA tenke halo esforsu ida oinsá bele viabiliza ida-ne’e. Tanba, normalmente, estrutura ne’e tenke bá iha Konsellu Ministru ho proposta mai husi RAEOA. Desizaun ne’e iha Konsellu Ministru. Kuandu seidauk mai, desizaun seidauk iha”, Taur preokupa.

Entretantu, Prezidente Autoridade RAEOA, José Luís Guterres simu pose husi Primeiru-Ministru, Taur Matan Ruak iha 13 novembru 2019 no mandatu eis Sekretáriu Rejionál sira RAEOA nian ramata iha loron 1 janeiru 2020.

Antes ne’e, Prezidente RAEOA, José Luís Guterres hateten, nomeasaun ba Sekretáriu Rejionál sira sei iha prosesu.

Lee mós:José Luís Guterres: “Ami Bele Hela Iha Dili, Serbisu iha Oé-Cusse La’o Nafatin 

Tuir kompozisaun anteriór, Sekretáriu Rejionál sesante kompostu husi Sekretáriu Rejionál ba asuntu Edukasuan no Solidariedade Sosiál, Arsénio Paixão Bano, Sekretária Rejionál asuntu Finansa, Leonia da Costa Monteiro, Sekretáriu Rejionál ba Ordenamentu Territóriu no Kadastru, Pedro de Sousa Xavier, Sekretáriu Rejionál ba asuntu Administrasaun, Francisco Xavier Márques, Sekretáriu Rejionál ba asuntu Agrikultura no Dezenvolvimentu Rurál, Regio da Cruz Salu, Sekretária Rejionál ba asuntu Saúde, Lucia Taeque, Sekretária Rejionál ba asuntu Turizmu Komunitária, Inácia da Conceição Teixeira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here