Reitor Unital, Florindo Pereira. Imajen Egas Cristovão

DILI, 06 fevereiru 2020 (TATOLI) – Magnífiku Reitór Universidade Oriental Timor Lorosa’e (UNITAL), Florindo Pereira deklara, sidadaun hotu iha direitu atu hetan justisa ida justu ba ninia problema, tan ne’e nia prontu hasoru malu ho eis-traballadór UNITAL na’in 61 iha Tribunál.

“Dalan ikus mak ida ne’e duni ba Arbitrazen ou Tribunál. Ho ida ne’e mak ita sei hatene no haree lia-loos,” Reitór Florindo Pereira ba Agência TATOLI, iha nia Gabinete, Kampus UNITAL, Becora, Dili, ohin.

Tuir autoridade másima UNITAL ne’e katak nia loloos ne’e mediasaun no konsiliasaun entre parte rua ne’e mak atu buka dalan oinsá atu solusiona problema sira ne’e. Agora delegasaun ne’ebé UNITAL haruka ba ne’e hetan tratamentu ida ladi’ak husi eis-dosente na’in 61 ne’e entaun hanesan reitór di’ak liu lalika ko’alia.

Tanba Universidade iha ninia estrutura, reprezentante Universidade nian iha ne’ebá, signifika sira ne’e delegasaun UNITAL nian tanba ne’e tenke konsidera. “Agora hakarak reitór mak tenke ba ida ne’e mós laloos. Ha’u la’ós ba atu insulta malu, ita nu’udar ema akadémiku no edukadu ita ko’alia kona-ba matéria, se hanesan nune’e di’ak liu lalika tuur hamutuk, ita lakon tempu de’it. Loloos ne’e ita presiza ulun malirin hodi simu malu”.

Tan ne’e, tuir nia, estrutura antiga ne’ebé mak marka ninia prezensa iha edífisiu SEFOPE (Sekretáriu Estadu ba Formasaun Profisionál no Empregu) hodi hasoru malu ho maluk sira ne’e mak hatene liu prosedementu legál UNITAL nian.

“Ha’u foin Tinan ida fulan tolu, ha’u mós check despaixu ne’ebé ha’u hasai iha de’it 17 pesoas. sira seluk ha’u la hatene maibé ha’u seidauk hasai ema ida”.

“Agora antes ne’e iha dosente lubuk ida mak mai ona iha UNITAL maibé lakohi atu hasoru ho ulun-malirin. Reitór husu tempu ba sira atu halo identifikasaun maibé sira lakohi, entaun oinsá atu atende. Maske hanesan Reitór maibé la lembra dosente hotu sá tan sira ne’ebé sai antes ona”.

Tanba ne’e, tuir Reitór UNITAL, Florindo Pereira katak nia presiza hetan fali lista husi parte administrasaun atu bele identifika dosente sira ne’e.

Eis-dosente sira ne’e hakarak sira ninia prezensa iha Kampus UNITAL agora kedan tenke rezolve sira-nia problema, ne’e la fásil; buat hotu presiza tempu entaun sira iha motivu seluk.

Notísia relevante:Seidauk Iha Solusaun, Eis-Traballadór UNITAL Planea Lori Reitór Ba Tribunál

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here