Diretór Jerál DNRN, Crisogno da Costa Neto. Imajen/Domingos Piedade

DILI, 05 fevereiru 2020 (TATOLI) – Iha tinan 2019, Diresaun Nasional Rejistu Notariadu (DNRN) Ministériu Justisa (MJ) kontribui reseita ba kofre Estadu hamutuk $1.794.775.00.

Notísia Relevante : DNRN Normaliza Ona Tratamentu Billete Identidade

Diretór Jerál  DNRN, Crisogno da Costa Neto, hateten, valor orsamentu hirak ne’e kobre husi reseita emisaun pasaporte komún,  pasaporte servisu, ho pasaporte diplomátiku.

Ba Ajénsia TATOLI, ohin, iha nia servisu fatin, Crisogno da Costa Neto, esplika, pasaporte ne’ebé DNRN atribui ho nia kategoria; pasaporte komún 14.781, pasaporte servisu  (882) ho pasaporte diplomátiku (150).

Reseita hirak ne’e kobre husi emisaun pasaporte iha Dili, Bobonaro ho mós Rejiaun Administrativu Espesial Oe-Cusse Ambeno (RAEOA).

 Timoroan iha Estranjeiru Presiza Renova Pasaporte ho BI

Oportunidade ne’e, Diretór Jerál DNRN), Crisogno da Costa Neto, hateten, nesesáriu tebes ba Timoroan iha estranjeiru atu renova sira nia dokumentu hanesan pasaporte, Billete Identidade (BI) no halo sertidaun moris ba labarik sira nian ne’ebé mak foin moris.

Timoroan sira ne’ebé presiza atu renova sira nia dokumentu, hateten Crisogno, namkari iha Korea du Sul, Australia, Inglaterra, Portugal no Irlanda Norte.

“Ha’u hanoin nesesáriu duni atu renova dokumentu ba timoroan hirak ne’e tanba sira sidadaun TL ne’ebé mak ba hela iha ema nia rain,” hateten Crisogno da Costa Neto.

Nia hateten, DNRN fasilita husi Ministériu Negósiu Estranjeiru no Kooperasaun (MNEK),  konsege halo levantamentu dadus husi loron 03 – 27 dezembru 2019 rejista ema hamutuk na’in 80.

Durante, fulan Dezembru 2019 ekipa ne’e la konsege halo renovasaun pasaporte, tanba sira seluk pasa tempu iha fatin seluk no balun serbisu okupadu. Nune’e mak iha Fevereiru no Marsu 2020, atu arranka fila fali ho objetivu halo levantamentu dadus, maibé orsamentu sumba tiha iha Parlamentu Nasional.

Nia mós dehan, embaixadór hirak ne’ebé mak simu ona tomada de posse ba Kore du Sul, Inglaterra, no Irlanda Norte, ko’alia ona ho DNRN atu iha futuru  rezolve situasaun dokumentu sidadaun Timoroan  sira nian iha nasaun hirak nee.

Jornalista   : Domingos Piedade Freitas

Editór         : Francisco Simões

HAKEREK NO HATÁN

Please enter your comment!
Please enter your name here