Kruzeiru Pacific Explore. Foto/Google.

DILI, 04 fevereiru 2020 (TATOLI)- Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, hateten  Ministériu Turizmu halo koordenasaun ho Ministériu Saúde (MS) no Cruz Vermella Timor-Leste no Imigrasaun atu halo antesipasaun ba pasajeiru kruzeiru Pacific Explorer hodi hala’o observasaun ba virus Corona.

“Ami hato’o ona karta ofisiál ba Ministériu Saúde para halo observasaun ba pasajeiru sira (kruzeiru Pacific Explorer) hafoin tun bá rai-maran atu antesipa no prevene virus corona tama iha Timor-Leste”, Quintas afirma iha Sentru Konvesaun Dili, ohin.

Kruzeiru MV. Pacific Explorer, aban, vizita Timor-Leste ho pasajeiru no tripulante ró hamutuk 2.945, totál turista de’it hamutuk 2.072 no tripulante 873.

“Ita bazeia ba informasaun katak pasajeiru kruzeiru ne’e maioria ema estranjeiru liuliu Austrália mak barak iha laran, maibé ita lahatene keta iha laran mós ema nasionalidade husi Xina”, katak.

Hodi dehan kona-ba virus Corona ne’e presiza duni antesipasaun tanba daudaun ne’e sai isu globál ne’ebé nasaun hotu-hotu preokupa hodi buka meiu atubele prevene afeta ba nia nasaun.

“Informasaun ne’ebé ita hotu-hotu akompaña katak husi parte imigrasaun mós foti ona desizaun liuliu ba ita-nia sidadaun Xina la permite atu tama iha ita-nia nasaun”, adianta.

Nune’e, José Quintas dehan iha ona koordenasaun atu halo pasa-revista ho material saúde hafoin pasajeiru sira bele vizita sítiu turístiku sira iha Dili no munisípiu sira.

“Aban ró to’o ne’e ekipa ida bele halo atendimentu liuliu pasajeiru sira para ita halo antesipasaun karik deteta iha moras ka virus Corona ne’e ita bele halo asaun lalais”, hakotu.

Entretantu, daudaun ne’e Governu Timor-Leste liuhusi ekipa liña ministerial asegura no kontrola aeroportu, portu no fronteira marítima atu prevene virus Corona tama Timor-Leste.

Notísia relevante : Aban, Turista 2.072 Vizita Timor-Leste ho Kruzeiru Pacific Explore

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here