Diretór Jerál Turizmu MTKI, José Filipe Dias Quintas akompaña ho ekipa sira hala’o konferénsia imprensa ba preparasaun simu Kruzeiru Pacific Explore. Imajen/Florencio Miranda Ximenes.

DILI, 04 fevereiru 2020 (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, informa kruzeiru MV. Pacific Explorer, aban, vizita Timor-Leste ho pasajeiru no tripulante ró hamutuk 2.945, totál turista de’it 2.072 no tripulante 873.

“Aban, ita hetan ró kruzeiru P&O Pacific Explorer mai vizita Timor-Leste ho turista 2.072 ho rute liuhusi illa Bali-Indonézia atu liu bá Darwin-Austrália tanba hetan tratadu (handle) husi Ajénsia Shipping LAI-ARA”, Quintas afirma liuhusi konferénsia imprensa iha Sentru Konvensaun Dili, ohin.

José Quintas dehan ró ne’e sei to’o iha Timor-Leste tuku 7:00 dadeer, hafoin ekipa halo pasa-revista, mak pasajeiru na’in-2.072 tun husi ró iha tuku 9:00 hodi vizita sítiu turístika sira iha Timor-Leste durante oras ualu nia laran.

“Ró kruzeiru ho turista sira kontinua mai vizita Timor-Leste tanba ita mós garante seguransa no estabilidade liuliu ita-nia nasaun hakmatek nia laran”, katak.

Hodi dehan kruzeiru tula pasajeiru ne’ebé maioria turista, ne’e meiu ida atu promove Timor-Leste ba mundu, liuliu sítiu turístiku no fó benefísiu ekonómiku ba povu.

Nune’e, Diretór Jerál Turizmu ne’e husu ba públiku atu fó atendimentu ho di’ak ba turista sira tanba turista sira mai ho pakote rua hanesan independent travel (vizita de’it sítiu turístika sira iha Dili laran)  no balun bá Munisípiu Ermera no Liquiçá.

“Ita-nia taksista no motorista mikrolete sira tenke fó presu razoavel ba turista sira atu sira fila mós promove Timor-Leste”, sujere.

Husi vizita kruzeiru ida ne’e,  MTKI liuhusi Diresaun Jerál Turizmu koopera hamutuk ho Imigrasaun, PNTL liuhusi Polísia Tránzitu, APORTIL, Diresaun Nasionál Transporte Marítima, Diresaun Nasionál Kuarentena no Bio Seguransa, Munisípiu Dili, Cruz Vermella, Muzeu Rezisténsia, Sentru Chega no  parseiru dezenvolvimentu sira hanesan Market Development Facility (MDF) no USAID inklui  setór privadu  sira ne’ebé toma konta ba pakote viajen operadór turístika (Concierge Confiavel de Timor, AOTTL, Timor Adventures, JDN) no negosiante lokál sira.

Hodi hatete iha atividade iha Portu laran hanesan fa’an produtu lokál husi vendedór Kor Timor, Alola Foundation, Thing and Stories, Café Uut no Nuu Laloir ne’ebé organiza husi Diresaun Nasionál Promosaun Turístika no Relasaun Internasionál hamutuk ho MDF.

“Ita-nia sasán ne’ebé vendedór sira fa’an maka artezanatu hanesan tais, estátua no Boneka Ataúro, no mós produtu husi indústria maka hanesan kafé, mina-nuu, no seluk tan ne’ebé ho kualidade di’ak”, dehan.

Nia salienta atividade fora husi Portu maka ajénsia operadór sira sei lori turista bá vizita fatin turístiku iha Dili hanesan Kristu Rei, Muzeu Rezisténsia, no bá munisípiu hanesan vizita Café Global Railaco-Ermera, Merkadu Tradisionál Gleno no ba Munisípiu Liquiçá vizita fatin istóriku sira.

Diretór Concierge Confiável Timor, Ricki Evaresto Agon Pinto. Imajen/Florencio Miranda Ximenes.

Diretór Concierge Confiavel Timor, Ricki Evaresto Agon Pinto, dehan daudaun ne’e prepara ona  transporte 30 atu tula turista sira ba sítiu sira iha Dili no Munisípiu Ermera no Liquiçá.

Entretantu, Xefe Planeamentu Operasionál Polísia Nasionál Timor-Leste, Alarico Barreto, hateten PNTL prontu ona atu garante seguransa ba turista sira hodi bele hala’o viajen ho di’ak durante iha kapitál Dili no munisípiu sira.

Ró Kruzeiru hetan sertifikadu husi “Corporation Certificate of British Registry” husi Reinu Unidu-Londres, no propriedade husi Carnivał Corporation &Plc. Kruzeiru refere nia operasaun dezde juñu 2017, operasaun husi P&O Cruises Australia Camival, ho destinu Súl Pasífiku, no kruzeiru ne’e iha fasilidade 8 hanesan  restaurante, pixina haat, Spa lima, salaun no bares hitu, sala halimar labarik rua.  Enkuantu kapasidade naruk (Length Overall): 260m/853ft, altura (Weight): 77,441 gross tonnage ho kapasidade tula ema na’in-2.945.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here