Sekretáriu Estadu Arte no Kultura, Teófilo Caldas

DILI, 13 novembru 2019 (TATOLI)—Oitavu Governu Konstitusionál liuhusi Sekretáriu Estadu Arte no Kultura (SEAK), Teofilo Caldas, halo abertura ba espozisaun pintura “Ha’u-Nia Kriasaun” iha Timor Plaza ne’ebé hala’o husi artista pintór surealis sira ne’ebé halibur-aan iha grupu artezenatu “Arte Moris” nia mahon.

“Programa oitavu Governu Konstitusionál fó kompeténsia ida ba Sekertária Estadu Arte no Kultura atu tau matan ba grupu kulturál no grupu artezenatu sira hanesan Arte Moris nian. Ha’u promote para mai halo abertura ba sira-nia espozisaun tanba ho espozisaun ne’e bele inspira artista pintór sira ne’e bele kria rasik kampu traballu no buka serbisu ba sira-nia aan,” dehan Teofilo Calda ba jornalista sira hafoin halo abertura ba espozisaun refere iha Timor Plaza, kuarta (13/11/2019).

Nia hatutan, pintura barak ke nia folin karun tebe-tebes konforme tipu ba pintura sira ne’ebé mak sira pinta. Tanba, nia dehan, pintura sira ne’ebé aprezenta iha espozisaun refere pintura surealis ne’eb’e pintór sira pinta kona-ba domin, kona-ba kultura, no balun pinta kona-ba istória funu nian ne’ebé ninia valor la hanesan.

Tanba ne’e, nia hateten, em prinsipiu Sekrtária Estadu Arte no Kultura kontinua dezenvolve grupu artezenatu sira no kontinua fó apoiu ba atividade artezenatus sira hanesan ne’e, para joven sira iha kreatividade liutan no joven sira bele kria kampu de serbisu ba sira-nia aan rasik.

“Agora SEAK mós iha orsamentu para atu fó apoiu. Iha 2020, ita preve orsamentu hamutuk kuatru miloens ital inklui saláriu vensementu, vens e servisu no transferensia publiku para ita atu haree ba atu fó apoiu ba grupu sira ne’e, ho intensaun ita hakarak dezenvolve grupu kultura sira, grupu  artezenatu bi artista sira,” nia dehan.

Dalabarak, nia hatutan, SEAK apoiu grupu sira ne’e ba halo no tuir espozisaun hodi lori sira-nia pintura sira ne’e hatudu iha rai liur. Daudaun ne’e, nia informa, SEAK mós prepara hela no sai parte iha Komisaun Organozadora ba Expo Dubai 2020 nian, entaun SEAK prepara hela atu halo selesaun dezenu ba grupu artezenatu sira.

Grupu artezenatu sira dezeñu ne’ebé di’ak, nia informa, sei reprezenta Timor-Leste hodi lori sira-nia pintura sira ne’ebé selesiandu sei ba partsipa iha Expo Dubai ne’ebé mak tuir planu sei realiza iha Junu 2020.

“Maibé ida ne’e SEAK sei halo kompetisaun. Tuir planu kompetisaun ne’e sei hala’o iha Janeiru-Marsu para Juñu ne’e, manan-nain sira ne’e bele ba tuir Expo Dubai 2020. Sei hili pintura sira ne’ebé iha lkualidade. La’os dehan ita promove grupu sira ne’em sira tenke halo pintura sira tuir sira-nia hakarak, ne’e la’os. Pintrra sira ne’e tenke tuir standar nasional no internasionalm” nia hateten.

Entretantu, Diretór Arte Moris, Julianto Pereira, haktuir espozisaun ho tema “Ha’u-Nia Kriasaun” ne’e aprezenta artista nain tolu ninia obra ne’ebé foti liu artezenatu nia sanak (aliran) surealis ne’ebé sira pinta buat ida ne’ebe liu realidade hodi aumemta sira-nia imajinasaun.

“Sira na’in tolu ne’e iha istilus keta-ketak maibé sira na’in tolu konkorda hodi foti sanak surealis ne’e. Ha’u apresia tebes ba sira-nia ideia ne’e tanba sanak ida ne’e ninia difikuldade boot la halimar. Sira nain tolu kolabora mosu ho rezultadu la’os ho ideia. Signifika sira na’in tolu pinta ida-idak ninian depois ramata mak tau hamutuk. Sira konkorda malu ho sanak surealis maibé kata item ida-idak ho ninia ideia rasik,” nia dehan.

Nia informa, artista pontór na’in tolu ne’ebé mak mout hamutuk iha sana surealis hodi realiza espozisaun refere mak artsita Almeida Gusmão (Meddy) husi Suai, Avelino Martins Soares (Ano) husi Viqueque, no artista pintór Agostinho do Rosario husi Baucau ne’ebé hamahon aan iha Arte Moris. Tuir planu, espozisaun ne’e hahú hala’o iha Kuarta (13/11/2019) no sei taka iha Sábadu (16/11/2019).

Jornalista: Cancio Ximenes

Editór       : Rafy Belo

HAKEREK NO HATÁN

Please enter your comment!
Please enter your name here