Estudante EBC Esperansa da Pátria, hamahan an iha ai-horis ne’ebé kuda iha 2016. Imajen/Florencio Miranda Ximenes.

DILI, 03 fevereiru 2020 (TATOLI) – Ensinu Báziku Sentrál (EBC, sigla portugés) Esperansa da Pátria iha área Becusi, suku Becora, Postu Administrativu Cristo Rei, Munisípiu Dili, sai modelu ba programa eskola verde ne’ebé lansa husi Sekretáriu Estadu Ambiente (SEA), Ministériu Edukasaun, Juventude no Desportu no apoia finanseira husi Programa Nasaun Unida ba Dezenvolvimentu (PNUD).

Iha 2016, EBC Esperansa da Pátria hetan ajuda husi SEA no kuda ai-oan hamutuk 145, husi totál ne’e ai-tanjung 106, ai-bua 18 no hali Portugál 21 no ai-oan ona sira ne’e moris hotu, buras hodi fó mahon ba estudante tomak.

“Ha’u lori Governu nia naran fó parabéns ba imi-nia eskola (EBC Esperansa da Pátria) ba profesora no estudante tomak tanba imi konsege kuidadu sai modelu ba Programa Eskola Verde iha Timor-Leste”, SEA Demétrio do Amaral de Carvalho afirma bainhira halo monitorizasaun no kuda ai-oan iha resintu EBC Esperansa da Pátria, Becora, ohin.

Sekretáriu Estadu Ambiente, Demétrio do Amaral de Carvalho, kuda ai-oan iha resintu EBC Esperansa da Pátria. Imajen/Florencio Miranda Ximenes.

Hodi dehan kuda ai-oan ne’e fasil, maibé atu tau-matan to’o buras ne’e difisil kuandu laiha vontade. Nune’e nia agradese ba vontade hodi asegura ambiente sai saudavel.

Eis deputadu ne’e dehan, EBC Esperansa da Pátria ne’e funda iha 2004, ho ambiente ida ne’ebé la saudavel no segura, maibé iha 2020 ne’e haree hahú matak tanba profesór no alunu sira kuidadu.

Nune’e, nia dehan hahú koopera ona ho MEJD atu EBC seluk iha Dili no munisípiu sira atu mai aprende fali jestaun asegura no kuida ambiente iha eskola ne’e.

Programa Eskola Verde ne’e iha Munisípiu Dili implementa ona iha EBC kuaze hitu no iha munisípiu balun ho objetivu atu hasa’e kultura no transforma mentalidade estudante sira-nia atu kuda ai-oan, labele soe lixu arbiru hodi moris iha ambiente saudavel.

Ministra Edukasaun, Juventude no Desportu (MEJD), Dulce de Jesus Soares, hato’o agradesimentu ba lideransa eskola, mestre no estudante sira tomak tanba konsege kuida ai-oan sira hodi moris buras loos.

“Ha’u mai hamutuk ho imi kuda ai-oan ne’e ba Programa Eskola Verde iha 2016, tinan haat ita mai fali agora ai sira komesa buras no fó mahon ona ba estudante sira”, katak.

MEJD kontinua koopera ho SEA atu implementa Programa Eskola Verde ba eskola EBC kuaze 1.819 iha territóriu atu hasa’e kultura kuda ai-oan liuliu jestaun asegura ambiente.

“Ami sei halo programa atu professor no estudante mai vizita eskola ne’e hodi bele halo tuir jestaun ambiente”, katak.

Diretór  EBC Esperansa Pátria, João da Silva Pereira, kontente tanba eskola ne’e sai  modelu ba Programa Eskola Verde iha territóriu Timor-Leste.

Nia dehan, EBC ne’e iha regra ne’ebé rigoroza tebes no bandu estudante sira soe lixu arbiru tanba kria ona lixeiru sira iha resintu eskola sira.

“Eskola ne’e hanesan ami-nia uma, ne’ebé ami tenke esforsu atu hamoos liuliu kuda ai-oan no soe lixu iha fatin atu asegura ami no estudante moris ho saudavel”, garante.

Totál estudante EBC Esperansa da Pátria hamutuk 1.692 ho professor permanente 54.

Notísia relevante : SEA Lansa Programa Eskola Verde Iha EBC Akanunu

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here