Sekretáriu Estadu Ambiente (SEA) servisu hamutuk ho PNUD lansa programa Eskola Verde iha Ensinu Báziku Sentrál Akanunu-Hera. Imajen/Florencio Miranda Ximenes.

DILI, 10 outubru 2019 (TATOLI) – Sekretáriu Estadu Ambiente (SEA) servisu hamutuk ho Programa Nasaun Unida ba Dezenvolvimentu (PNUD) lansa programa Eskola Verde iha Ensinu Báziku Sentrál (EBC, sigla portugés) Akanunu-Hera, hodi mobiliza estudante, profesór no inan-aman sira partisipa ativa iha atividade kuda ai-oan iha área konsteira sira.

Diretora Nasionál Sentru Edukasaun no Informasaun Ambientál SEA, Aménica Machado Fernandes, hatete lansamentu programa Eskola Verde ne’e ho objetivu atu hasa’e koñesimentu sosiedade liuliu estudante sira atu hadomi ambiente liuhosi kuda ai-oan.

“Atu hasa’e konxiénsia labarik ka estudante sira hadomi ambiente liuhusi kuda no rega inklui kuidadu ai-oan to’o boot hodi fó mahon ba sira”, Diretora Aménica Machado afirma iha lansamentu Eskola Verde iha Akanunu-Hera, ohin.

Programa Eskola Verde ne’e, nia dehan hahú implementa iha tinan ne’e (2019) iha Eskola Bázika Sentrál to’o Sekundária hamutuk hitu iha munisípiu Dili, Manufahi, Kovalima no Vikeke.

“Ami haree estudante sira eskola Esperansa da Pátria, Kristál no Kasait kuaze kuda ona ai-horis mós moris hotu kuaze 200-resin”, katak.

Nune’e, Diretora ne’e salienta sei kontinua alarga programa Eskola Verde ne’e ba eskola hotu atu hahú husi estudante sira ho konxiénsia hadomi ambiente no so’e lixu iha fatin.

Iha fatin hanesan, Xefe Departamentu Diresaun Nasionál Floresta no Jestaun Basias Hidrográfkas, Jacinto Soares, dehan floresta sei kontinua apoia programa Eskola Verde ne’e atu hahú iha eskola bazika sira to’o universidade atu hadomi ambiente liuhusi kuda ai-oan.

“Programa ne’e pozitivu tebes tanba kuda ai-oan sira iha rai mamuk ambiente eskola atu sai boot fó mahon no ar saudavel ba ita-nia ona sira”, dehan.

Programa ne’e hakarak eduka estudante sira hahú ensinu báziku atu sai boot bele hadomi no hatene importánsia ambiente no floresta.

Diretór Eskola Bázika Sentrál Akanunu-Hera, João Reis da Cruz, orgullu no apoia tebes ba programa Eskola Verde ne’e no prontu atu jere rega ba ai-oan 100-resin hodi sai boot no hodi ambiente sai saudável ba estudante no profesór sira.

“Ami hanesan edukadór sei esforsu atu programa Eskola Verde bele la’o di’ak”, kompromete.

Global Climate Summit 2019, hatudu mundu hasoru dezafiu barak kona-ba alterasaun klimátika, tanba ne’e sistema ONU nian ajuda nasaun sira prepara ema atu hasoru mudansa sira ne’ebé akontese no halo jestaun ba rekursu naturál sira.

Jornalista: Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here