Abro Fernandes

DILI, 9 jullu 2019 (TATOLI)—Xave ne’e la’ós iha vontade ka hakarak atu manán… ema ida-idak iha xave ida ne’e. Importante liu mak iha vontade halo preparasaun di’ak ba vitória ida-nian.

Karik nia bele monu iha loron horisehik, karik nia bele halo sala iha nia moris, maibé labele husik ninia-án lakon no rende ba ema sé-sé de’it. Iha ne’e, kampiaun ida-idak iha ninia meiu rasik atu sai kampionatu, maibé iha dalan rua ne’ebé hanesan mak sira “ESFORSU” no sira “REZA” atu manán ka hetan vitória.

Situasaun ida ne’e mak akontese ba fighter One Pride Mixed Martial Arts (MMA) no Kampionatu Nasionál One Pride MMA 2016 iha Indonézia, Abrão Fernandes ka koñesidu ho naran Abro Fernandes. Atu tuir eventu MMA One Championship iha Sudeste Aziátiku iha Kuala Lumpur, Malázia, ne’ebé atu hadau sintu Flywight ho todan 61,2kg ne’e, nia esforsu-án treinu maka’as hodi bele manán no sai kampiaun iha eventu refere.

Abro Fernandes

Tanba ne’e, iha segunda (8 jullu 2019), Abro Fernandes ho ninia promotór HAN ACADEMY NO INDOGYM iha Solo, Java Sentrál, Indonézia, ho ninia treinadór Johan Mulia Legowo aranka ona ba Kuala Lumpur-Malázia. Dadaun ne’e, sira hela iha Hotel THE PEARL Kuala Lumpur-Malázia no toba-latan hakmatek hela iha fatin-toba ho númeru 1321.

“Ohin dadeer (tersa, 9 jullu 2019), ami atleta ema 30 halo check up medis hodi check raan, urina  (mii) no check ulun ka kakutak. Ninia rezultadu pozitivu hotu. Kona-ba check ka scan ulun (kakutak) ne’e, atu hatene problema ulun nian. Scan ba ema ida-nia ulun han minutu rua nia laran. Check up raan no scan kakutak ne’e hala’o iha Ospitál Taman Desa Medical Center Kuala Lumpur-Malázia. Check urina hala’o iha Hotel The Pearl. Loron tuir mai mak ami sei halo sesaun hasai retratu,” informa Abro Fernandes ba Agência TATOLI liuhusi entrevista via rede sosiál, tersa (9/7/2019).

Hafoin faze ida ne’e, sei iha faze preparasaun treinamentu nian ba atleta ida-idak hodi hametin sira-nia beran, tátika, tékniku no estratéjia oinsá atu bele halakon ninia adversáriu. Treinamentu ida ne’e, hala’o atu hamanas de’it preparasaun lubun ne’ebé sira halo antes ne’e iha sira ida-idak nia nasaun. Manán ka lakon, nu’udar mehi ema ida-idak nian bazeia preparasaun sira ne’ebé sira hala’o durante ne’e.

Iha eventu internasionál ida ne’e, Abro Fernandes sei lori nasaun rua nia naran mak nasaun Timor-Leste no Indonézia. Tanba Mixed Martial Arts (MMA) ne’e nu’udar jogu profisionál entaun nia bele lori bandeira rua nia naran. Iha fight ne’e, Abro Fernandes sei luta kontra atleta MMA hosi Índia ho naran Guardarshan Mangat.

 “Ha’u prepara ona fíziku, tékniku no tátiku. Hirak ne’e, ha’u prátika loro-loron iha ha’u-nia moris no iha fatin treinu. Ha’u sei halakon nia ho téknika no stand up fight ka tuku malu hosi leten de’it. Laiha riba no kunci. Tuku, tebe, sikut no uza ain-tuur. Ha’u hatene ona ninia frakeza sira mak iha boxing (tuku). Ha’u fiar án manán %99 tanba ha’u prepara di’ak liu atu hasoru nia,” dehan Abro Fernandes ho fiar án.

Tanba Abro Fernandes lori mós bandeira Timor-Leste entaun nia presiza tebes husu apoiu ba povu Timor-Leste atu reza ba nia. Orasaun mak sai ninia forsa espirituál ne’ebé sei tulun nia atu manán no manán. Nia fiar katak ho povu Timor-Leste nia orasaun, lori esperansa foun ba nia atu bele manán iha fight ne’ebé sei hala’o iha sesta (12 jullu 2019) iha Kuala Lumpur-Malázia.

“Ha’u prontu ona! Ha’u presiza tebes povu Timor-Leste nia orasaun. Ha’u fiar-án atu manán. Maibé, Maromak fó oportunidade ka lae? Ha’u prontu manán %99 no %1 ne’e Maromak fó oportunidade ka lae,” dehan Abro Fernandes.

Jornalista: Cancio Ximenes

Editór: Xisto Freitas

HAKEREK NO HATÁN

Please enter your comment!
Please enter your name here