Prezidente Repúblika, Francisco Guterres Lú Olo. Imajen Tatoli/António Gonçalves

DILI, 31 dezembru 2019 (TATOLI)–Prezidente Repúblika (PR), Francisco Guterres Lú Olo, fiar katak ezisténsia Konsellu Veteranu ho nia ógaun ezekutivu sira sei dignifika eroi sira ne’ebé fó-an ba libertasaun rai ida-ne’e. 

Konfiansa ne’e Xefe Estadu hato’o liuhusi diskursu komemorasaun Loron Nasionál Eroi iha rotunda Prezidente Nicolau Lobato, Comoro, Dili, tersa ne’e.

Xefe Estadu haktuir, Primeiru Kongresu Kombatente Libertasaun Nasionál, eleje membru ba órgaun Konsellu Kombatente Libertasaun Nasionál. Tanba ne’e, nia aproveita oportunidade ida-ne’e hodi fó parabéns ba Sekretáriu Estadu Asuntu Kombatente Libertasaun Nasionál, Gil da Costa “Oan Soro”, tanba ho dedikasaun tomak konsege organiza kongresu ida-ne’e ho susesu.

Xefe Estadu mós felisita Prezidente Konsellu Kombatente Libertasaun Nasionál ne’ebé eleitu durante Primeiru Kongresu ne’e ba períudu tinan lima, Riak Leman, ho nia estrutura no órgaun nasionál tomak.

Lee mós: Riak Leman, Prezidente Konsellu Nasionál Veteranu

“Ho orgullu boot ha’u partisipa nu’udár membru ida husi Konsellu Konsultivu ba Administrasaun, hanesan dalan ida hodi kontribui atu dignifika kombatente sira hotu. Ha’u fiar katak ho eventu ida-ne’e ita hakat tan pasu importante ida hodi serbí kombatente sira hotu no ajuda ita-nia Estadu dignifika loloos sira ne’ebé fó-an tomak ba pátria no povu”, Xefe Estadu hateten.

Nia dehan, eroi no eroína sira hanesan sidadaun sira ho sentida responsabilidade boot, tanba sira hasoru terus oioin no fakar sira-nia ran mak lori Timor-Leste bele hetan ukun rasik-an.

“Eroína Maria Goretti dehan katak: “Ha’u nia isin la’ós ha’u-nian ona, maibé ha’u nia klamar sei sai ha’u-nia rohan-laek”. Ida-ne’e liafuan moruk ne’ebé hodi hakribi moris, maibé ho klamar ida-ne’ebé sei la mate tanba defende nia povu no nasaun”, PR Lú Olo sita.

Nia dehan tan, bainhira Nicolau Lobato mate iha kombate, iha loron 31 dezembru 1978, eroi sira konsege re-organiza rezisténsia no garante unidade entre lideransa no povu, hodi re-estrutura baze sira tanba sentidu patriótiku kuda ona iha ida-idak nia fuan no laran.

Aleinde ne’e, nia hatutan, eroi sira hotu iha konsiénsia katak hasoru funu ida-ne’ebé sei naruk no presiza envolvimentu povu tomak nian no baze sira transfere husi foho ba vila no tuir bá inimigu nia uma-laran.

“Nune’e, ohin nu’udár Estadu ida, livre, independente no demokrátiku, ita iha obrigasaun hodi partisipa no kontribui ba dezenvovimentu nasionál ho tensidade, ho responsabilidade, ho matenek no persisténsia tuir ita-nia eroi no eroína sira hanorin. Ita iha mós obrigasaun hodi tranzmite ba jerasaun foun ita-nia istória loloos, ne’ebé ita hotu orgullu no lori ita to’o ukun rasik-an”, nia subliña.

Tanba ne’e, Xefe Estadu husu ba ema hotu, Governu, Konsellu Kombatente Libertasaun Nasionál, ne’ebé halibur kombatente sira hotu, Muzeu Resisténsia, Sentru Nasionál CHEGA, Komité Orientadór 25, no sira seluk tan, serbisu hamutuk hodi hakerek istória luta libertasaun nasionál ho rigór no responsabilidade.

Xefe Estadu husu tanba eransa importante ne’ebé hetan husi eroi no eroína sira hanesan osan-mean ne’ebé timoroan rasik bele husik ba oan no beioan sira.

“Ita selebra loron ida-ne’e hodi rekoñese no valoriza duni ita-nia eroi no eroína sira no kombatente hotu-hotu. Ho nune’e, ita bele iha konfiansa katak ita-nia nasaun sei buras ba beibeik”, nia fiar.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here