DILI, 29 janeiru 2020 (TATOLI) –Komunidade Aldeia Ailele-hun ho Lenuk-hun, Suku Kamea, Postu Administrativu Kristu Rei, Munisípiu Dili, dezde tempu okupasaun Indonézia nian mai to’o ukun rasik-an, seidauk asesu ba fasilidade bee moos ho estrada di’ak.
Notísia Relevante : Aldeia Haat iha Suku Manleuana Falta Bee Moos
Xefe Aldeia Ailele-hun, Maliquis Lemos Barreto, informa, nia komunidade hamutuk uma-kain 203 ne’ebé hela iha foho Kamea nia lolon sofre bee moos.
“Se sira atu hetan bee-moos tenke lori masa mai kuru iha bee-matan ne’ebé la’o ain dook uitoan,” hateten Xefe Aldeia Maliquis Lemos Barreto, ba Ajénsia TATOLI, ohin, iha Sede Suku Kamea, Dili.
Nia hateten, la’ós komunidade sira hela iha foho lolon de’it, maibé hirak ne’ebé hela tuun mai iha tetuk mós la bele asesu bee moos tanba la iha duni liña distribuisaun bee-moos ba aldeia laran.
Iha fatin hanesan, Xefe Suku Kamea, Matos da Costa, reforsa katak, kondisaun mínimu ne’ebé komunidade enfrenta tinan barak, hanesan la iha bee moos ho asesu estrada aat, sai ona preokupasaun klásiku tinan bain loron. Maibé, la iha solusaun to’o agora.
Matos da Costa, nu’udar xefe suku hato’o ona preokupasaun no halerik komunidade aldeia rua ne’e nian ba Governu, liuhusi Konsellu Ministru iha Governu ida ne’e nian no Governu sira liu-ba, maibé seidauk iha resposta pozitivu ba preokupasaun sira ne’e.
Suku Kamea iha aldeia 12 mak hanesan Aidak Be Hare, Ailele-hun, Ailok-laran, Bedois, Bubur Lau, Kaisabe, Fatuk Francisco, Has-laran, Lases, Lenuk-hun, Namalai, Suku laran ho Terminal ho nia populasaun 3.000-liu.
Jornalista : Osória Marques
Editór : Francisco Simões
