Traballador Seasonal Worker Programne na'in-103 rona hela lian menon husi SEFOPE Julião da Silva. Imajen/Natalino Costa.

DILI, 28 janeiru 2020 (TATOLI) – Timoroan hamutuk 103 sei bá serbisu iha Austrália liuhusi programa serbisu sazonál (SWP, sigla inglés) iha semana ne’e.

Diretór Nasionál Empregu Esteriór, Filomeno Dotes, informa Sekretáriu Estadu Formasaun Profisionál no Empregu (SEFOPE), ohin, halo serimónia pre-departure briefing (PDB) hodi introdús ba traballadór sira atu hatene lala’ok serbisu iha nasaun viziña ne’e, antes sira bá  iha sábadu no domingu ne’e.

“Traballadór sira hamutuk na’in-103 (inklui feto 10) maka sei arranka bá Austrália iha semana ne’e nia-laran hodi bá serbisu (iha ortikultura)”, nia dehan ba jornalista sira hafoin loke PDB iha sentru SENAI Becora, ohin.

Timoroan hirak ne’e sei haknaar iha kompañia tolu maka hanesan Empreza Multiple Pricing, 2P8 no Madek.

Antes dezloka, SEFOPE presiza introdús ba sira kona-ba kultura Austrália nian, kondisaun serbisu no saida maka sei halo iha ne’ebá.

Iha fatin hanesan, Sekretáriu Estadu Formasaun Profisionál no Empregu, Julião da Silva, husu ba timoroan sira ne’ebé maka atu bá serbisu hatudu hahalok di’ak durante iha ne’ebá.

“Ida ne’e maka esforsu Governu atu redús dezempregu iha ita-nia rai, tanba ne’e ha’u husu ba imi tenke hatudu atitude di’ak hodi evita hahalok aat, nune’e empreza na’in sira bele tau fiar nafatin atu ba futuru labele taka oportunidade ba timoroan sira seluk”, salienta.

Nia fó hanoin ba traballadór sira katak bainhira osan iha ona, labele uza ba buat seluk maibé tenke haruka mai família hodi bele ajuda atu haburas ekonomia uma-laran no uza hodi kontribui ba dezenvolvimentu nasaun.

Notísia relevante : Timoroan 63 sei Bá Serbisu iha Austrália Durante Tinan Tolu

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here