Traballadór PLS tuir breafing antes bá Austrália. Imajen Tatoli/ Natalino Costa.

DILI, 22 janeiru 2020 (TATOLI) – Koordenadór ba programa Pacific Labour Scheme (PLS) hosi Sekretáriu Estadu Formasaun Profisionál no Empregu (SEFOPE, sigla portugés), Paulo Rodrigues, informa timoroan na’in-63 sei bá serbisu iha Austrália durante tinan tolu.

Koordenadór ba programa Pasific Labour Scheme nian husi SEFOPE, Paulo Rodrigues. Imajen/Natalino Costa.

“Sira ne’e sei bá serbisu iha Austrália durante tinan tolu hosi programa PLS rasik”, nia dehan ba jornalista sira hafoin realiza treinamentu kona-ba free the partial briefing iha East Timor Development Agency (ETDA) Fatuhada, ohin.

Treinamentu ne’e ho objetivu atu fó koñesimentu di’ak liután ba traballadór sira oinsá atu bá serbisu iha nasaun viziña ne’e, presiza hatene kontratu, ambiente serbisu, oinsá bele koopera ho australianu sira, hatene regulamentu tanba regra sira ne’e mesak rigór, nune’e maka traballadór sira presiza hatene antes arranka.

Timoroan sira ne’e sei dezloka iha janeiru ne’e, maibé molok bá, sei asina deklarasaun ho SEFOPE, atubele hatene saida maka atu bá halo iha Austrália.

Traballadór 63 ne’e hetan ona kontaktu hosi kompañia tolu iha Austrália, hanesan Meat Fill ne’ebé timoroan na’in-50 maka sei ba serbisu iha ne’ebá, King Berling Accommodation, na’in-11 hala’o sei knaar iha fatin refere iha área ospitalidade nian no na’in-rua iha Raitex iha parte ortikultura nian.

Paulo Rodrigues esplika prosesu teste ba programa PLS ne’e dezde tinan kotuk no loke ba públiku ho transparente tanba kompañia sira maka mai fó teste direta ba traballadór.

“Vaga ba aplikasaun ho online, loke ba joven hosi munisípiu 12 inklui Rejiaun Administrativa Espesiál Oe-Cusse Ambeno (RAEO) no prosesu ne’e hosi australianu sira maka halo”, salienta.

Skill Development Manager ba Programa PLS, Brett Thomson. Imajen Tatoli/ Natalino Costa.

Iha fatin hanesan, Skill Development Manager hosi programa PLS, Brett Thomson, realsa treinamentu free the partial briefing importante tebes ba traballadór timoroan sira ne’ebé atu bá serbisu iha Austrália. Tanba hosi ida ne’e sei esplika ba sira kona-ba konteúdu kontratu traballadór nian atu sira bele hatene bainhira hala’o knaar iha ne’ebá.

“Durante treinamentu ne’e la’o, traballadór na’in-63 ne’e bele foku, nune’e sira bá serbisu iha Austrália bele halo di’ak, empreza sira tau fiar ba sira atubele loke oportunidade ba timoroan seluk”, salienta.

Aleinde ne’e, traballadór Herculano Hornay kompromete katak nu’udar joven ida konsidera oportunidade ne’e di’ak no sei aproveita hodi kontribui ba ekonomia família no ba dezenvolvimentu país.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here