iklan

INTERNASIONÁL, HEADLINE

PM Enkoraja Embaixadór Foun Sira Hala’o Knaar ho Responsabilidade no Lealdade

PM Enkoraja Embaixadór Foun Sira Hala’o Knaar ho Responsabilidade no Lealdade

Primeiru-Ministru, Taur Matan Ruak, foto hamutuk ho embaixadór na'in-sia ne'ebé simu pose husi Prezidente Repúblika, tersa ne'e. Imajen Tatoli/António Gonçalves

DILI, 28 janeiru (TATOLI)–Embaixadór na’in-sia ne’ebé ohin hetan ona pose hosi Prezidente Repúblia (PR), Francisco Guterres Lú Olo, mai hato’o despedida no rona mensajen hosi Primeiru-Ministru (PM), Taur Matan Ruak, molok hatutan sira-nia misaun diplomátika iha rai-li’ur.

Embaixadora Timor-Leste dezignadu ba Singapura, Maria Natália Guterres Viegas Carrascalão, haktuir enkontru ohin Xefe Estadu enkoraja atu embaixadór sira bele serbisu ho didi’ak.

“Primeiru-Ministru fó mensajen ba ami hotu, idak-idak bainhira ba país ne’ebé ami reprezenta Timor-Leste, tenki halo ami-nia knaar ho di’ak, dignidade, responsabilidade no lealdade”, Embaixadora ne’e tenik iha Palásiu Governu, tersa ne’e.

Notísia Relevante: Prezidente Repúblika Husu Embaixadór Na’in-sia Haklaken Pás

Entretantu, PM Taur husu atu embaixadór idak-idak iha ninia problema ne’ebé tenke trata iha país ne’ebé reprezenta ne’e hafoin filafali mai Timór.

“Ami tenke koordena sempre ho Governu no Estadu timoroan atu hatene saida mak ami bele halo liután iha relasaun  diplomátika entre país sira di’ak liután, nune’e mós tau-matan ba ami-nia komunidade timoroan”, nia akresenta.

Biban ne’e, nia haklaken, iha país balun ne’ebé laiha komunidade timoroan maibé balun iha barak, tanba ne’e nu’udar embaixadór/a tenke tau-matan ba situasaun ida-ne’e.

“Ami mós tenke haree se iha país balun ne’ebé hakarak investe iha-ne’e ka karik país balun iha buat ruma ne’ebé ita bele haree no bele aproveita”, nia dehan tan.

Maria Natália fó ezemplu katak serbisu ne’ebé mak embaixadór sira bele haree iha rai-li’ur mak buka tan bolsu estudu ba jerasaun foun sira no bele buka tan fatin serbisu hanesan ba Koreia, Japaun, Austrália  no país seluk tan.

“Ami reprezenta diplomatikamente no polítikamente. Nu’udár embaixadór/a, ami hanesan imajen ba Timor-Leste. Tanba ne’e, ami tenke halo sasán hotu la’o ho di’ak no loos no transmite saida mak Timor-Leste hakarak transmite ba li’ur”, Natália subliña.

Jornalista: Julia Chatarina

Editór: Xisto Freitas

iklan
iklan

Leave a Reply

iklan
error: Content is protected !!