Prezidente Repúblika, Francisco Guterres Lú Olo (loos), ohin, pose Embaixadór Timor-Leste ba Kamboja, Hermenegildo Lopez (karuk), ho embaixadór sira seluk iha Palásiu Prezidente Nicolau Lobato. Imajen Tatoli/Egas Cristóvão

DILI, 28 janeiru 2020 (TATOLI)–Prezidente Repúblika (PR), Francisco Guterres Lú Olo, husu embaixadór na’in-sia (9) ne’ebé ohin simu pose atu reprezenta Timor-Leste iha estranjeiru tenke haklaken kona-ba pás. 

Prezidente Lú Olo husu ne’e, liuhusi diskursu serimónia pose iha Salaun Xina, Palásiu Prezidente Nicolau Lobato, Bairru Pite, Dili, ohin.

“Iha ninia asaun, embaixadór tenke hatudu imajen nasaun ne’ebé nia reprezenta. Embaixadór sira ne’ebé reprezenta ita-nia nasaun, hakarak atu haklaken kona-ba pás, diálogu no prinsípiu sira ne’ebé iha ninia konsisténsia ba pás no onra iha ema hotu nia matan. Ita nia kooperasaun tenke ho nia baze prinsípiu maka instrumentu pás nian”, PR Lú Olo subliña.

Tanba ne’e, Xefe Estadu iha esperansa katak embaixadór sira sei susesu iha misaun ne’ebé idak-idak sei hala’o iha rai-li’ur.

“Ha’u iha esperansa katak imi hotu sei susesu iha serbisu ne’ebé mak imi sei hala’o iha kontestu misaun ne’ebé nasaun tau konfiansa atu hala’o iha estranjeiru”, nia konfia.

Prezidente Repúblika mós husu ba embaixadór sira atu hakle’an relasaun ho komunidade internasionál, nune’e bele fó kontribuisaun ba pás, nu’udár rikusoin umanidade ne’ebé iha folin boot.

Prezidente Repúblika foti oportunidade atu fó atensaun filafali kona-ba konfiansa katak iha mundu bainhira mosu konflitu, diálogu maka tenke halo.

“Ikusliu, ha’u hakarak atu fó oportunidade ida-ne’e atu deklara ha’u-nia disponibilidade, bainhira de’it maka presiza, ha’u sei fó apoiu no ajuda embaixadór sira”, PR hato’o nia prontidaun.

Entretantu, Liuhusi Dekretu Prezidente Repúblika ne’ebé asina ona antes, Xefe Estadu dekreta hodi nomea embaixadór/a extraordinária no plenipotensiáriu maka hanesan Maria Natália Guterres Viegas Carrascalão ba nasaun Singapura ho númeru dekretu Prezidensiál 13/2020, Hermenegildo Lopez ba nasaun Kamboja ho númeru dekretu Prezidensiál 14/2020, Juvita Rodrigues Barreto de A. Gonçalves ba Estadu Vatikanu ho númeru dekretu Prezidensiál 15/2020, Abrão dos Santos ba Repúblika Populár Xina ho númeru dekretu Prezidensiál 16/2020, Isabel Amaral Guterres ba nasaun Portugal ho númeru dekretu Prezidensiál 17/2020, Maria Renata Caldas de Jesus ba nasaun Laos ho númeru dekretu Prezidensiál 18/2020, Inês Maria de Almeida ba nasaun Australia ho númeru dekretu Prezidensiál 19/2020, Gil da Costa ba nasaun Reinu Unidu no Irlanda Norte ho númeru dekretu Prezidensiál 20/2020 no Ilídio Ximenes da Costa ba nasaun Japaun ho númeru dekretu Prezidensiál 21/2020.

Marka prezensa iha serimónia pose ne’e, Ministru Negósiu Estranjeiru no Kooperasaun (MNEK), Dionísio Babo Soares, Xefe Kaza Sivíl, espoza Prezidente Repúblika, Xefe Kaza Militár, funsionáriu Palásiu Prezidente Repúblika no família sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here