Jerente ConocoPhillips iha Timor-Leste, José Lobato, no Diretór Nasionál CNFP-Tibar, Simão Tito Barreto, bainhira partisipa serimónia graduasaun formandu 24 iha área elétriku no instrumentasaun. Imajen/Florencio Miranda Ximenes.

TIBAR, 28 janeiru 2020 (TATOLI) – Jerente Kompañia ConocoPhillips iha Timor-Leste, José Lobato, hatete empreza prontu apoia finanseira ba Formasaun Padraun Globál (GTS) hodi hasa’e abilidade timoroan hodi partisipa iha indústria.

“ConocoPhillips apoia ona kuaze millaun $2,5 ba programa Formasaun ho Padraun Globál ba dahuluk no daruak”, José Lobato afirma hafoin partisipa iha serimónia graduasaun ba graduandu 24 iha Sentru Nasionál Empregu Formasaun Profisionál Tibar (CNEF, sigla portugés), ohin.

Formasaun iha nivel I no II partisipa ona husi timoroan na’in-44 iha elétrika no instrumentasaun nian ne’ebé dezenvolve hosi ConocoPhillips, ne’ebé reprezenta parseiru Joint Venture Bayu-Undan, Autoridade Nasionál Petróleu no Minerál (ANPM) no SEFOPE, no implementa konjuntamente hosi CNEFP-Tibar no CEGELEC Oil & Gas.

José Lobato dehan formasaun nivél dahuluk ne’e partisipa husi formadu 20 no daruak 24. “ Ita sei apoia tan maizumenus rihun $600 ba formasaun nivel datoluk ba timoroan sira”, katak.

Hodi dehan kontinua tulun tanba formadu primeiru na’in-20 ne’ebé indústria absorve hotu ka hetan hotu ona serbisu no faze daruak na’in-24 mós 17 hetan ona empregu. “Ita kontinua tenta atu na’in-hitu seluk indústria bele absorve iha futuru mós”.

ConocoPhillips nian funsaun ida liuliu iha Bayu Undan atu fó mós kapasitasaun ba timoroan hodi iha abilidade iha setór petróleu para hametin sustentabilidade iha futuru.

Treinamentu vokasionál ba nivel datoluk nian iha 2020 ne’e, hahú loke no monta ona publisidade iha mídia sira atu timoroan bele kompete.

“Ami hein katak programa formasaun vokasionál ne’e kontinua ho sustentabilidade hodi hasa’e abilidade timoroan liuliu foin sa’e sira”, espera.

Notísia relevante : Formandu 24 Gradua iha Área Elétrika no Instrumentasaun

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here