Prezidente ANMP, Gualdino da Silva, Jerente ConocoPhillips, José Lobato, no Diretór sira Iha SEFOPE hasai foto hamutuk ho graduadu na’in-24 Iha área elétrika no instrumentu. Imajen/Florencio Miranda Ximenes.

TIBAR, 28 janeiru 2020 (TATOLI) – Formandu 24 graduadu iha Segunda Programa Formasaun Profisionál iha área Elétrika & Instrumentasaun iha Sentru Nasionál Empregu Formasaun Profisionál Tibar (CNEF, sigla portugés).

Sertifikadu Nivel II iha formasaun Elétrika no Instrumentasaun nian ne’e dezenvolve hosi ConocoPhillips ne’ebé reprezenta parseiru konsórsiu Bayu-Undan, Autoridade Nasionál Petróleu no Minerál (ANPM) no SEFOPE, no implementa konjuntamente hosi CNEFP-Tibar no CEGELEC Oil & Gas.

Kursu ho durasaun fulan 12 ne’e husi formandu mane 17 no feto na’in-hitu ne’e tuir teoria fulan neen no prátika fulan neen iha dixiplina rua ne’e.

Jerente ConocoPhillips iha Timor-Leste, José Lobato, kongratula formadu 24 tanba kontinua hatudu vontade to’o finaliza formasaun ne’e.

“ConocoPhillips no ami-nia parseiru JV sente orgullu tebes hodi apoia programa ida-ne’e no ami ansiozu tebes atu haree graduandu sira aplika abilidade no koñesimentu ne’ebé hetan ona durante sira-nia estájiu no iha karreira aban-bainrua nian”, José Lobato iha CFEFP-Tibar, ohin.

Nia dehan haree ba programa ConocoPhillips kontinua apoia formasaun sira ne’e atubele hasa’e abilidade timoroan sira hodi kompete iha indústria ho sustentabilidade.

Nune’e, Jerente José Lobato hakarak konfirma rekrutamentu ba programa datoluk nian hahú daudaun ona iha 2020 no enkoraja timoroan atu konkorre ba oportunidade hodi hetan esperiénsia.

Prezidente ANPM, Gualdino da Silva, agradese ba kooperasaun di’ak ho ConocoPhillips no ninia joint ventures (JV) liuhusi Bayu-Undan nia Projetu Konteúdu Lokál ho Rekuperasaun ba Kustu ne’ebé suporta realizasaun ho susesu ba programa formasaun ba abilidade ne’ebé foka ba formasaun Nivel 1 & 2 iha área Elétrika no Instrumentasaun nian.

Prezidente ANPM, Gualdino da Silva, entrega sertifikadu ba graduandu. Imajen/Natalino Costa.

Gualdino dehan Formasaun Padraun Globál (GTS) nian no konkordánsia atu kontinua hodi apoia programa ba grupu datoluk nian ba interese di’ak hosi nasaun nia forsa traballu ne’ebé kualifikadu.

“Felisita graduadu na’in-24 ne’e ida-idak no dezeju katak imi hotu bele aplika abilidade téknika no profisionál ne’ebé hetan ona ne’e ba iha setór indústria reál nian. Hakarak enkoraja timoroan sira hotu ne’ebé iha interese atu hetan abilidade no koñesimentu tékniku hodi bele preparadu didi’ak ba oportunidade iha tinan balun oinmai”, afirma.

Gualdino mós agradese ba partisipante iha indústria nian ne’ebé komprometidu ona atu simu estajiáriu sira, tantu ba finalidade estájiu no mós ba empregu nian.

Diretór Ezekutivu Sekretariadu Estratéjia Nasionál Empregu, Aniceto Leto Soro, lori SEFOPE nia naran apresia programa formasaun ne’ebé hala’o ona iha CNEFP Tibar katak hetan susesu tebes no estudante na’in-24 gradua.

“Ami hakarak tebes atu kontinua formasaun ida-ne’e iha aban-bainrua. SEFOPE hakarak atu espresa agradesimentu ba kooperasaun di’ak tebes entre SEFOPE, Autoridade Nasionál ba Petróleu no Minerál, ConocoPhillips, CEGELEC Oil and Gas no Sentru Nasionál Tibar ne’ebé komprometidu atu apoia foin-sa’e sira através programa ne’ebé fó valór di’ak”, katak.

Diretór Nasionál CNEFP-Tibar, Simão Tito Barreto, dehan formadu sira ne’e hetan formasaun durante tinan. “Husi totál ne’e na’in-14 mak serbisu ona iha ajénsia balun no balun seidauk hetan fatin, maibé ami sei esforsu hodi akompaña sira to’o hetan traballu”.

Nia garante formadu sira ne’e iha kualifikadu di’ak atubele kompete iha merkadu traballu liuliu iha área eletrifikasaun no instrumentasaun nian.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here