Diretór Nasionál CNFEP Tibar, Simão Tito Barreto. Imajen Tatoli/Egas Cristóvão

TIBAR, 28 janeiru 2020 (TATOLI) – Diretór Nasionál Sentru Nasionál Empregu Formasaun Profisionál Tibar (CNEFP, sigla portugés), Simão Tito Barreto, hateten sentru formasaun ne’e kapasita ona timoroan hamutuk 5.000 iha área profisionál oioin.

“Totál fulan oin ita gradua tan formadu 100-resin ne’e kompleta rihun 5 ne’ebé hetan ona sertifikadu profisionál”, Diretór Simão Tito Barreto afirma hafoin serimónia graduasaun ba formandu 24 iha Tibar, ohin.

Diretór ne’e dehan totál partisipante 5000 ne’ebé hetan sertifikadu profisionál ne’e iha kompeténsia no abilidade ona atu asesu ba merkadu traballu iha rai-laran no li’ur.

Husi númeru ne’e, kuaze porsentu 95 mak asesu ona ba postu traballu. “Ha’u grantidu ba ida ne’e, tanba agora daudaun indústria mai halo pedidu, mas ita-nia graduandu sira mak seidauk sufisiente ba vaga sira iha indústria sira ne’e iha rai-laran”, afirma.

Totál formadu ne’e iha área espesializada konstrusaun ba joven sira iha área lima hanesan eletrisidade, kanalizasaun, karpintaria, pedreiru no soldadura.

Aléinde ne’e, balun iha área agrikultura haree liu ba ortikultura, re-florestasaun no kriasaun animál, iha mós ospitalidade, house kipping no food iha nivel I to’o nivel III. Iha área marítima no jestaun portu, enerjia alternativa iha painél solár ho bio-gás ninian.

“Iha mós pakote sira seluk ne’ebé indústria ne’ebé ita dezeñu hela liuliu ba bomba bee no iha kursu halai liu ba levantamentu konstrusaun ninian”, salienta.

Simão Tito Barreto adianta hafoin formandu sira hetan graduasaun no simu sertifikadu profisionál, CNEFP-Tibar kontinua akompaña no monitoriza to’o asesu ba merkadu traballu.

“Normalmente ita iha númeru kontaktu ho baze dadus ne’ebé sira fó hela ba ita kuandu gradua ona fulan tolu primeiru to’o fulan neen, ita mantein kontaktu ho sira atu hatene sira hetan serbisu ona ka lae? Mas se seidauk, ita fasilita sira atu hetan informasaun ba vaga sira no to’o asesu merkadu traballu”, garante.

Notísia relevante : ConocoPhillips Prontu Apoia Finanseira ba Kapasitasaun Timoroan

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here