Prezidente Konsellu Administrasaun BNCTL, Brígido de Sousa. Imajen Tatoli/Egas Cristovão

DILI, 28 janeiru 2020 (TATOLI) – Prezidente Konsellu Administrasaun Banku Nasionál Komersiu Timor-Leste (BNCTL, sigla portugés), Brígido de Sousa, hateten BNCTL finansia empreza rua iha área turizmu nian liuhusi eskema garantia kréditu.

“BNCTL finansia ona empreza rua hosi Lautem iha área turizmu nian, ida ba restaurante, ida ba ótel iha Tutuala ho eskema garantia kréditu”, Brígido de Sousa informa ba TATOLI iha Timor Plaza, segunda ne’e.

Hodi hatutan, empreza rua ne’ebé maka asesu ona ba eskema garantia kréditu ne’e liuhosi prosesu hanesan hatama proposta no BNCTL halo avaliasaun no analiza hodi haree katak proposta ne’e merese atu asesu ba eskema ne’e, entaun BNCTL haruka ba Banco Central Timor-Leste (BCTL) no aprova.

“Agora dadauk ami konsidera proposta balu tama tan, sira-nia proposta atu haki’ak manu, fahi. Tuir loloos BNCTL no BCTL hakarak halo serimónia formál ida hodi halo lansamentu ofisialmente tanba públiku seidauk hatene eskema garantia kréditu ne’e, maibé lakonsege tanba lansa ho de’it proposta rua ne’e nia efeitu ladún makaas, ne’ebé ami sei halo hela esforsu atu aproxima liután ba kliente sira ne’ebé halo negósiu ba iha área sira bele kobre hosi eskema ne’e hodi bele hatama proposta mai ami”, Brígido afirma.

Proposta rua ne’e asesu ona eskema garantia kréditu iha fulan novembru 2019 ne’ebé kada proposta rihun $10.

Iha parte seluk, Prezidente Konsellu Administrasaun BNCTL ne’e dehan empreza timoroan barak maka laiha vontade atu asesu ba eskema ne’e tanba seidauk komprende di’ak.

“Ami hamutuk ho Banku Sentrál atu oinsá atrai ema, promove, introdús eskema ne’e ba kliente sira ne’ebé hakarak atu asesu. Hanesan ita hatene katak eskema garantia kréditu ne’e kobertura risku ba de’it setór haat (agrikultura, turizmu, pekuária no prosesamentu hahán), maibé ita-nia empreza médiu sira-nia envolvimentu iha setór sira ne’e mínimu tebtebes, karik tanba koñesimentu, risku, buat sira ne’e hanesan liga ho agrikultura nian katak sasán sira ne’e sira prodús ema la hola, hanesan haki’ak animál dala ruma bele akontese hanesan foin lalais virus ida kona-ba fahi ne’e no halo fahi mate hotu, buat sira ne’e hotu halo sira tauk”, katak.

Maske nune’e, Brígido dezafia empreza ki’ik sira atu habrani an hodi foti risku no negósiu iha área sira ne’ebé hetan kobertura hosi eskema ne’e, maibé dala barak liu empreza sira iha Timór sira-nia negósiu iha kontrusaun no kioske, maibé rua ne’e lahetan kobertura hosi eskema refere.

“Entaun setór sira ne’ebé hetan kobertura hosi eskema ne’e maka setór produtivu sira para halo buat ruma hodi prodús fali buat ruma, más ánimu komunidade nian atu investe iha área sira ne’e maka menus tebes, parese tanba sira-nia koñesimentu menus iha área sira, no sira mós lakohi foti risku”.

Tanba ema barak seidauk informadu sobre eskema ne’e maka BNCTL sei koopera ho Ministériu Turizmu, Komérsiu no Indústria atu tun bá munisípiu sira hala’o enkontru, konvida empreza lokál sira hodi rona esplikasaun oinsá asesu ba eskema ne’e ho ninia rekizitu sira.

Notísia relevante : Ema Ne’ebé Asesu ba Sistema Garantia Kréditu Tenke 100 % Timoroan

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here