Governadór BSTL, Abraão de Vasconcelos. Foto/Jorgerjo Guterres.

DILI, 26 jullu 2019, (TATOLI)-Governadór Banku Sentrál Timor-Leste (BCTL, sigla portugés), Abraão de Vasconcelos, informa BSTL deside ona katak atividade ekonómika ne’ebé maka atu hahú implementa iha Sistema Garantia Kréditu ne’e porsentu 100 tenke timoroan.

Tanba ne’e atividade ekonómika ne’ebé sirkula iha lista BSTL nian, kuaze 90 ne’ebé halai liu ba setór agrikultura, turizmu, indústria manufatureira, transporte no armazenamentu, no alojamentu no restaurante ne’e timoroan mak bele asesu. Nia montante másimu BSTL define kedan.

“Iha faze ida ne’e porsentu 100 tenke timoroan, ida ne’e na’in ba empreza. Ema bá serbisu ne’e hanesan peritu ka konsultór ruma bele ema estranjeiru, mas na’in labele, tenke timoroan”, Governadór hatete bainhira dada lia ho Tatoli iha edifísiu BSTL, ohin.

Nune’e liuhusi sistema ne’ebé BSTL dezenvolve ho plataforma online ne’e, sei haree ema rai-li’ur, feto no mane hira, timoroan feto no mane hira mak serbisu, plataforma rejista hotu.

“Aban-bainrua Governu hakarak haree ami-nia programa Sitema Garantia Kréditu ne’e feto estranjeiru na’in hira mak serbisu iha ne’ebá, dadus ne’e kompletu iha sistema laran”, Governadór ne’e afirma.

Aléinde ne’e iha rekizitu lubuk ida no BSTL tenta atu simplifika tiha no atividade ne’ebé elejivel ne’e Banku Sentrál define hotu.

Abrão esplika sistema ne’ebé sei utiliza ba iha garantia kréditu kompletamente digitalizadu no Banku Sentrál koordena ho Banku Nasionál Komérsiu Timor-Leste (BNCTL-sigla portugés) no BNCTL mak koordena ho ema ne’ebé maka atu asesu ba kréditu ne’e.

“Mas, kliente sira tenke hato’o proposta ba BNCTL uza formuláriu sira-ni’an. Depois maka BNCTL hatama iha sistema, halo análize ba proposta kréditu depois haruka ba Banku Sentrál, no iha Banku Sentrál ne’e laiha suratahan ida, hotu-hotu dijitál hanesan aplikasaun kobertura garantia hosi banku sira mai iha banku sentrál”.

Daudaun ne’e BNCTL de’it maka partisipa iha implementasaun sistema garantia kréditu, maibé Bank Republik Indonesia (BRI) no Bank Mandiri sei iha prosesu interna sira-nia tanba atu partisipa hodi sai implementadór, banku komersiál sira tenke apply (konkorre) tanba la’os automátika banku hotu implementa.

Razaun sira tenke hatama pedidu tanba Banku Sentrál hakarak haree prosedimentu sobre kréditu ne’e aliña ho dekretu lei no regulamentu banku sentrál nian ka lae? Tanba iha dispozisaun balu iha dektru lei ne’e rigorozu, nune’e Banku Sentrál hakarak garante katak banku sira-nia prosedimentu internál ne’e mós tenke aliña ho buat ne’ebé iha dekretu lei.

Tanba BNCTL partisipa ona maka atubele asesu ba garantia ne’e, pekena média empreza bele kontaktu ho BNCTL hodi hatama pedidu (proposta ba negósiu) tanba formuláriu banku refere prepara ona hafoin banku halo análize durante semana tolu no bainhira aprova ona kréditu sei haruka ba BSTL hodi husu kobertura hodi sistema ne’e fó garantia ba kréditu.

“Kuandu Banku Sentrál aprova, risku ne’ebé empreza iha, nia la selu fali kréditu, proporsaun balun ne’e sistema mak menanggung tiha (ne’e ba banku la’ós kliente) para fó insetivu ida ba banku komersiál sira hakarak fó kréditu ba empreza sira”.

Iha biban ne’e, Governadór dehan sei organiza feira ba empreza ki’ik no média sira hahú husi Dili bá munisípiu no ida ne’e atu fó informasaun sobre prosesu oinsá atu asesu ba kréditu liuhusi sistema garantia.

“Oinsá atu harii kompañia, prosesu ne’e oinsá? Ida ne’e hanesan báziku ida no Banku Sentrál hakarak halo interasaun ho empreza sira ki’ikoan”.

Nia esplika sobre empreza ida ki’ik ne’e nia empregadu husi neen to’o 20 no empreza média mak husi 21-50 .

Atubele hetan kréditu maka empreza ki’ik no média prienxe informasaun no prepara dokumentu hanesan kópia sertifikadu rejistu iha SERVE, tenke hetan sertidaun dívida tanba ezijénsia ne’e mai kedan ho dekretu lei depois ho proposta negósiu no banku komersiál (fó kréditu) sei ezije garatór, karik nia diretór ou na’in.

Hafoin BNCTL simu hodi hatama dadus no halo análiza preliminár ida ba dadus no haree katak dadus ne’e iha posibilidade para BNCTL atu finansia entaun submete notifikasaun aplikasaun ba BSTL.

“Ida ne’e sistema garantia kobre riksu BNCTL 70%”.

Notísia relevante : Sistema Garantia Prontu Simu Pedidu ba Kréditu

Jornalista : Antónia Maia

Editora : Maria Auxiliadora