Coronavirus

DILI, 27 Janeiru 2020 (TATOLI)-Diretora Jerál Prestasaun Saúde, Odete Viegas da Silva hateten,virus corona ne’e bele transmite ba se de’it bainhira ema ne’ebé sistema imunidade tuun entaun ida ne’e bele afeta lalais.

Virus corona ne’e hanesan sintoma baibain, isin manas me’ar, iis boot maibé bainhira nia komplikadu ba iha pneumonia bele sai moras ida ne’ebé mak agudas. Moras ne’e afeta ba ita-nia sistema respiratóriu.

“Ezemplu hanesan ema sira ne’ebé mak viajen ba nasaun afetadu hanesan Xina, Japaun Tailándia, Korea Sul, Nepal, Vietnam, Honkong, Singapura, Malázia, Austrália Estadu Unidu no mós Fransa, ema ruma mak ho sintomas virus corona hanesan ne’e labele besik,’’ Diretora Odete Viegas da Silva ba jornalista sira iha Diresaun Nasionál Servisu Ospitalár no Emerjénsia, Caicoli, ohin.

“Ema me’ar tenke taka ibun, fani tenke taka ibun ka espasu ne’ebé mak dook ba ema ne’ebé mak ita suspeita no mós fase liman beibeik ho sabaun tanba ida ne’e virus ida ne’ebé bele transmite ba se de’it no ema ne’ebé sistema imunidade tun entaun ida ne’e bele afeta liután,” nia esplika.

Diretora Jerál Prestasaun Saúde ne’e hateten, pasu ne’ebé mak Ministériu Saúde (MS) halo ona mak hanesan dezenvolve ona deklarasaun saúde relasiona ho virus corona hanesan banner no informasaun ne’ebé mak MS tau iha aeroportu, portu no fronteira no kazu ne’e liga ho pasajeiru ne’ebé mak tama sai entaun ita tenki haree postu ida ne’ebé mak atu ita fó atensaun.

“Agora daudaun iha ekipamentu neen mak Ministériu Saúde tau iha Portu, Aeroportu no Fronteira entaun ekipamentu sira ne’e iha. Se bainhira ita detekta kazu saida mak ita hetan iha pasajeiru bainhira to’o mai iha Aeroportu mak suspeita karik entaun ekipa sira ne’ebé mak preparadu iha ne’ebá mak hanesan ambulánsia sira tenke halo kedas transfere ba Ospitál Nasionál Guido Valadares”.

Nia informa, HNGV mós iha fatin izolamentu, iha HNGV nia kotuk, fatin ne’e la tau hamutuk ho pasiente sira seluk no iha fatin refere iha kama 10 para ita preparadu ba pasiente ne’ebé mak afeta ba virus corona. Iha fatin ida ne’e maibé HNGV prepara ona proposta ba OMS (Organizasaun Mundiál Saúde) no parseiru sira seluk katak sira mós prontu atu apoiu ita ba iha ekipamentu no mós masker, luvas no ropa protesaun nian inklui reazente sira.

“Maibé ha’u hakarak hateten em termos de ita suspeita ba moras bainhira atu hetan diagnóstika ne’ebé loos katak bainhira nia sampel (amostra) haruka ba Austrália atu teste ka konfirmasaun tanba ita laiha reazente ba ida ne’e só ema ida ne’ebé maka iha kapasidade maka’as atu nune’e bele teste ba ida ne’e”.

Diretora Jerál Prestasaun Saúde Odete Viegas da Silva akresenta, pasajeiru sira ne’ebé mai husi fatin afetadu maka tama mai ona ho sintoma. Entaun ida ne’e mak ita atu buka atu haree hanesan isin manas maka’as, me’ar, iis boot depois mak ita foin teste konfirmasaun no ita mós haree ba raiu-x tanba nia mós hanesan moras pneumonia ida ne’ebé mak nia kauza hanesan seidauk hatene tanba husi ida ne’e mak ita teste konfirmasaun ita hatene husi ida ne’e.

“Bainhira ema seidauk hatudu nia sintoama iha Timór mak ami fó deklarasun saúde ba sira tanba ne’e mak ami mós tau nia mai husi nasaun ne’ebé no sai husi nasaun ne’ebé no mós númeru kontaktu iha hotu se bainhira nia hetan moras ne’e”.

Ezekutiva ne’e reforsa, depois nia viajen mai la iha sintoma mak mosu sintoma derepente ne’e nia mós iha obrigasaun atu telefone departamentu vijilánsia atu bele hato’o informasaun sira ne’e no sira-nia ekipa mós sei buka hatene ba informasaun ida ne’e.

“Entaun agora daudaun ami enkontru ho ekipa integradu ida husi Ministériu Agrikultura veterenáriu karantina hamutuk mós husi Organizasaun Mundiál Saúde, UNICEF no parseiru sira seluk ne’ebé mak servisu hamutuk ho Ministériu Saúde atu fó informasaun kona-ba lala’ok saida mak daudaun ne’e ita enfrenta”.

Alende Ministériu Saúde liuhusi Diretora Jerál Prestasaun Saúde informa mós katak kazu globál ba virus corona iha mundu ne’ebé pasiente sira afeta hamutuk 1.320.

To’o agora pasiente ne’ebé mak afeta ba virus ida ne’e hamutuk 1.320 no nasaun sira ne’ebé afetadu ba moras ne’e mak hanesan Japaun, Tailándia, Korea Sul, Nepal, Vietnam, Honkong, Singapura, Malázia, Austrália, Estadu Unidu no mós Fransa.

“Totál kazu 1.320 ne’e 1.297 mak afetadu iha nasaun Xina 23 kazu ne’e mai husi nasaun sira seluk ne’ebé afetadu husi kazu ida ne’e no pasiente ne’ebé mak afetadu ba mate hamutuk 41 no kazu ida ne’e afeta ba ema idade 40 ba leten no ba labarik sira husi idade 13 no 14 ba leten no labarik ki’ik seidauk identifika,” nia relata.

Notísia relevante:Prevene Virus Corona, Timoroan Hotu Tenke Kumpre Giaun OMS

 Jornalista    : Felicidade Ximenes

Editór           : Rafy Belo

HAKEREK NO HATÁN

Please enter your comment!
Please enter your name here