Ministru Estadu Prezidénsia Konsellu Ministrus Hermenegildo Augusto Cabral Pereira. Imajen/Antonio Goncalves

DILI, 23 outubru 2019 (TATOLI) – Governu liuhosi reuniaun Konsellu Ministru (KM) iha kuarta ne’e, hahú rona Proposta Investimentu Privadu ba Jestaun Rezídu Sólidu Urbanu husi Kompañia TNA Solution, hodi bele halo resiklajen ba lixu iha Kapitál Dili.

Maski Governu iha ona sistema foun atu rekolla lixu, ne’ebé uza kontentór ho modelu veíkulu no ekipamentu móvel, no mós aumenta kualidade fatin soe lixu tuir padraun operasionál iha fatin soe lixu Tibar, maibé to’o agora seidauk iha alternativa atu transforma lixu sai produtu ne’ebé bele uza.

Notísia Relevante: MAE Aprezenta Modelu Foun Rekolla Lixu Ba KM

Ministru Estadu Prezidénsia Konsellu Ministru, Hermenegildo Augusto Cabral Pereira, hateten Ministériu Administrasaun Estatál (MAE) konvida kompañia TNA Solution iha reuniaun ezekutivu, atu halo aprezentasaun kle’an oinsá atu transforma lixu ba produtu ne’ebé útil.

“Transforma lixu ba produtu ne’ebé di’ak hodi bele uza fali, em vez de soe arbiru de’it”, nia tenik iha Palásiu Governu.

Governante ne’e dehan, maski aprezentasaun  di’ak tebes maibé KM seidauk hola desizaun no fó instrusaun ba MAE hodi kontinua esforsu, nune’e bele fó solusaun ba rekolla lixu no prosesu atu transforma lixu ba bens ruma hodi hatún problema lixu iha kapitál.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here