Fahi-luhan. Imajen google

DILI, 27 janeiru 2020 (TATOLI) – Diretór Jerál Pekuária no Veterinária Ministériu Agrikultura no Peska (MAP), Domingos Gusmão, hateten kada tinan, MAP liuhusi Diresaun Nasionál Veterinária regularmente halo vasinasaun no tratamentu ba balada sira hanesan karau, fahi no manu, hodi prevene husi moras.

“Vasinasaun no tratamentu ne’ebé regularmente ou kada tinan dala ida ne’e ba fahi no karau atu hasa’e imunidade liuliu fahi nia ba hasoru moras kólera, mas kada fulan tolu halo vasinasaun no tratamentu ne’e ba manu de’it”, Diretór Jerál Domingos afirma ba Ajénsia TATOLI iha Komoro, ohin.

Nia dehan moras kólera fahi ne’e mosu iha Timor-Leste dezde tempu okupasaun Indonézia iha 1997. Nune’e, pur anu Governu aloka orsamentu ba programa vasinasaun no tratamentu ba balada sira hodi prevene moras ne’e.

Iha Orsamentu Jerál Estadu 2019, aloka ba Diresaun Nasionál Veterinária rihun $450, maibé ba programa vasinasaun no tratamentu ba animál sira ne’e kuaze porsentu ki’ik liu.

“Ami-nia programa ne’e ho orsamentu ki’ik iha 2019 vasinasaun ba fahi, karau no manu iha territóriu la halo kompletu, mas kuaze porsentu 40 mak hetan vasinasaun”, katak.

Nia dehan alokasaun osan ba programa ne’e, liuliu atu sosa medikamentu la to’o. “Iha 2019, ita husu apoia mós doadór sira hanesan FAO no organizasaun seluk mas la to’o vasinasaun no tratamentu porsentu 100 ba animál sira iha Timor-Leste”, katak.

Nune’e, nia dehan MAP halo vasinasaun no tratamentu balada sira hodi hasa’e nia imunidade hasoru cholera ne’e animál liuliu fahi la mate arbiru iha Timor-Leste.

“Só ke, virus African Swine Fever (ASF) mosu  ne’e halo fahi kuaze rihun $16 mate, mas daudaun halo asaun preventiva liuhusi bioseguransa ne’ebé fahi mate hahú menus ona”, adianta.

“Ha’u alerta ba populasaun sira atu kolabora ho ekipa veterináriu sira iha kada munisípiu atubele halo vasinasaun no karik presiza atu halo tratamentu ba balada sira atu prevene husi moras kólera fahi”, diretór ne’e husu.

Moras kólera nia sintoma kuaze hanesan, maibé sei iha vasinasaun no bele mós halo tratamentu, mas virus ASF ne’e seidauk iha vasinasaun.

“Ami sei kontinua vasinasaun no tratamentu ba balada sira hodi prevene husi moras hog cholera no ba virus ASF ne’e só ita aplika de’it mak bioseguransa”, katak.

Prevene Virus ASF, Diretór Jerál Veterinária no Pekuária ne’e dehan presiza aplika bioseguransa hodi evita sirkulasaun ka transportasaun fahi ne’ebé hetan virus ona bá fali área ne’ebé seidauk iha epidémiku ba virus ne’e.

“Munisípiu balun ne’ebé sei livre husi virus African Swine Fever (ASF) ami la rekomenda atu sira halo movimentasaun fahi ba-mai”, katak.

Munisípiu sira hanesan Manufahi, Ainaro no Rejiaun Administrativa Espesiál Oe-Cusse- Ambeno (RAEOA), no Postu Administrativu Ataúro ne’ebé sei livre ne’e ekipa veterinária aplika ona sistema bioseguransa atu proteje fini fahi ne’ebé sei iha.

“Ita aplika programa bioseguransa ne’e mak hapara transportasaun fahi, tenke iha luhan, kontrola fahi nia hahán, fó hariis no hamoos luhan kada loron inklui vasinasaun no tratamentu”, katak.

Antes ne’e, Veterináriu Timor-Leste, Alípio Almeida, hatete fahi sira ne’ebé sei livre husi moras ne’e, di’ak liu Ministériu agrikultura no Peska (MAP) halo ona vasinasaun liuliu ba moras ida kólera fahi (hog cholera).

Tanba moras ida ne’e bele hada’et husi fahi nia kutun, nune’e fahi ne’ebé karik nia kutun iha, MAP nia pesoál saúde animál sira iha munisípiu hotu, ne’ebé bele halo tratamentu ba fahi nia kutun sira atu labele hada’et moras sira ba fahi ne’ebé iha.

Notísia relevante : Fahi Ne’ebé sei Livre Husi Moras Di’ak Liu Halo ona Vasinasaun

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here