Veterináriu Timor-Leste, Alípio Almeida. Imajen/Rob.

DILI, 17 janeiru 2020 (TATOLI) – Veterináriu Timor-Leste, Alípio Almeida, hatete fahi sira ne’ebé sei livru husi moras, di’ak liu Ministériu Agrikultura no Peska (MAP) halo ona vasinasaun, liuliu ba moras ida kólera fahi (hog cholera).

“Kuandu Governu halo vasinasaun, fahi na’in tenke fó sira-nia fahi ba vasinadór hodi redús fahi labele mate”, Alípio Almeida ba TATOLI iha Aeroportu Dili, foin lalais ne’e.

Tanba moras ida ne’e mós bele hada’et husi fahi nia kutun, nune’e nia dehan fahi ne’ebé karik nia kutuk iha, MAP nia pesoál saúde animal iha munisípiu hotu, sira serbisu ba komunidade gratuita, nune’e bolu sira halo tratamentu ba fahi nia kutun atu labele hada’et moras ka baktéria sira ba fahi ne’ebé mak iha.

 Veterináriu timoroan ne’e dehan relasiona ba peste suína afrikana ka african swine fever (ASF) ne’ebé tama iha Timor-Leste liuhusi produtu ne’ebé ema importa no atu prevene husi fatin ida ba fatin seluk, di’ak liu ba sítiu ne’ebé mak seidauk kona moras ida ne’e, produtu fahi hanesan na’an ka fahi ne’ebé infetadu ona labele lori bá fatin ne’ebé sei moos.

“Se lae, fatin ne’ebé mak sei livre, ha’u rona iha Ataúro, di’ak liu ho na’an fahi iha Dili labele ba Ataúro, se lae mós kona- hotu no atu prevene ba nasaun seluk ezemplu bá Austrália, aviaun ne’ebé mak bá Austrália ho nia pasajeiru sira di’ak liu halo spray, nune’e ema ne’ebé mak bá halo desinfectante (dezinfetante) atu Austrália labele kona moras”, katak.

Aléinde ne’e, iha área ne’ebé mak dook husi sidade hanesan iha Same, Ainaro, nia fahi seidauk mate, fahi ho na’an fahi husi sidade labele lori bá.

Antes ne’e, Diretór Jerál Pekuária no Veterinária MAP, Domingos Gusmão, hatete MAP garante peste suína afrikana sei la mosu tan iha tinan ne’e, tanba uza ona sistema bio-seguransa.

“Ami garante virus ne’e sei la mosu tan iha tinan ne’e (2020) tanba ita hahú esforsu hodi pelumenus ita-nia fahi sira agora la mate tan ona”, Diretór Jerál afirma.

Númeru fahi ne’ebé mate iha territóriu Timor- Leste tuir dadus MAP nian kuaze rihun 16. “Foin daudaun mate barak ne’e tanba ita laiha preparasaun no ita-nia tékniku sira mós ita la orienta kona-ba ida ne’e, ne’ebé ita halo prevensaun baibain de’it, derrepente virus ASF tama makaas loos no akompaña mudansa klimátika ita labele halo buat ida. Maibé, ikus mai ita konsege hatún virus, ne’ebé to’o agora fahi la mate arbiru”, katak.

Hodi dehan MAP sempre garante, maski virus ASF ne’e to’o agora nia laiha vasina. Maibé MAP atende no proteje fini fahi lokál no rasa sira atende liuhusi bio-seguransa.

Entretantu, peste suína afrikana ne’ebé foin mosu iha inísiu setembru to’o ohin loron kuaze erradikasaun másima halo tuir dadus no provizóriu agora laiha fahi mate.

Virus ne’e tuir teste laboratóriu makaas liu iha Dili, Baucau, Lautem, Liquiçá, Bobonaro no munisípiu seluk ladún.

MAP kontinua aplika sistema bio-seguransa hodi fó asisténsia téknika atu populasaun hakiak fahi tenke ho luhan, ho hahán di’ak inklui asegura nia saúde liuhusi medikamentu.

Domingos Gusmão adianta ASF ne’e jeralmente kona de’it ba fahi sira ne’ebé na’in husik de’it la’o livre. “Ami-nia kontrolu ba fahi sira iha luhan ne’e la mate no pois sira ne’ebé uluk vasina ne’e la mate tanba iha seguransa ba bio-seguransa, maibé fahi sira husik livre mak mate barak”, dehan.

Sobre dadus detalladu, nia dehan ekipa task force rekolla hela, ne’ebé iha fulan ne’e komesa hatama hotu atu haree totál fahi hira mak mate no porsentu virus ASF tun bá hira ka elimina ona inklui ekonomikamente populasaun lakon hira mak foin bele públika iha fulan oin.

MAP ho Banku Aziátiku Dezenvolvimentu (ADB, sigla inglés), Food and Agriculture Organization (FAO) no Banku Mundiál halo hela peskiza ida adekuada atu identifika no halo estudu ba da’et virus ASF hahú oinsá no hatún ninia infesaun ne’e halo oinsá. MAP hetan apoia husi ADB hodi kontrata ona espesialista moras fahi husi Filipina hodi hala’o estudu ho Organizasaun Saúde Animál Mundiál (OIE) atubele elimina virus ASF ne’e.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here