Komandante Seksaun EOD-UEP Sarjentu Xefe, Estaqui de Jesus Ximenes. Imajen/Eugénio Pereira

DILI, 27 janeiru 2020 (TATOLI)-  Durante tinan 2019, Komandu Polisia Nasionál Timor-Leste (PNTL) husi Seksaun Explosive Ordinance Disposal,  Unidade Espesiál Polisia  (EOD-UEP) konsege halo destruisaun ba materiál explozivu 50-resin ne’ebé populasaun sira hetan iha territóriu Timor-Leste.

Notísia Relevante : UEP Na’in 25 Tuir Formasaun ba Misaun Pás ONU

Materiál explozivu  hanesan, granada morteiru, kilat musan, granada liman no materiál funu sira seluk ne’ebé balun ativa hela.

Komandante Seksaun EOD-UEP Sarjentu Xefe, Estaqui de Jesus Ximenes dehan, materiál explozivu 50-resin ne’ebé EOD-UEP halo destruisaun maioria ho tipu granada morteiru  ne’ebé husik hela husi Guerra Mundiál II no funu invazaun 1974-1975 nian.

Sasán explozivu sira ne’e maioria komunidade sira hetan iha Munisípiu Baucau, Viqueque, Manatuto, Manufahi, Covalima, Ainaro no Dili.

“Ita halo ona destruisaun ba materiál explozivu  hamutuk kuaze 50-resin ne’ebé ita  identifika sensitivu tebes, se ema ruma hetan ba sunu ka tuku nia bele rebenta kedas,” dehan Sarjentu Xefe UEP, Estaqui  de Jesus Ximenes, ohin, ba jornalista iha Komandu EUP-Bairru-Pité, Dili.

Iha domingu (26/01/2020), ekipa EUP halo mós destruisaun ba granada morteiru ne’ebé komunidade sira hetan iha área Suku Manleuna bainhira sira kee rai kuak atu halo uma.

Komandu UEP apela ba povu hotu bainhira hetan materiál explozivu funu nian, di’ak liu labele book no kontaktu ba polisia hodi koloka ekipa espesiál halo destruisaun.

“Komunidade sira balun hetan materiál ne’e sira hanoin besi aat, sira tuku halimar, kuidadu materiál balun sei ativu bele rebenta, tanba ne’e apela ba populasaun sira, se imi la koñese materiál sira ne’e di’ak liu kontaktu polisia mak ba foti,” afirma Sarjentu Xefe Estaqui  de Jesus Ximenes.

Durante tinan 20017, 2018 too 2019,  UEP simu mós proposta kuaze 20 liu husi komunidade sira atu ba halo destruisaun ba materiál explozivu sira ne’ebé povu sira hetan iha munisípiu, maibé EUP labele ba halo destruisaun tanba la iha transporte, kombustivel no osan atu suporta servisu UEP nian.

Matéria explozivu sira ne’e dala ruma susar atu halo identifikasaun ba ninia tinan fabrika no sasán husi nasaun ne’ebé nian, tanba hetan ho kondisaun ativu no ferrujen ona.

Durante ne’e UEP kria ona planu no programa hodi prodús broxura no sensibilizasaun informasaun ba autoridade suku sira, maibé tanba orsamentu la iha programa paradu too agora.

“Ami kria ona programa atu halo sensibilizasaun fahe informasaun ba povu, liu-liu labarik sira hili sasán sira ne’e labele tuku ka sunu hanesan iha kazu Lospalos nian rebenta afeta ba labarik sira kanek todan, maibé problema ne’ebé ami enfrenta mak la iha orsamentu suporta servisu sira ne’e,” tenik nia.

Problema seluk tan ne’ebé UEP enfrenta maka husi 2002 too 2012 sira menus ekipamentu servisu nian hanesan fardamentu atu uza halo destruisaun ba materiál sensitivu sira komesa aat ona.

Tuir nia katak, uluk Guarda Nasionál Republikanu (GNR) Portugál maka fó apoiu materiál servisu, maibé materiál sira ne’e ninia kondisaun labele utiliza ona.

Estaqui hatutan, Governu Xina mós, foin lalais, fó apoiu ba farda anti terrór hamutuk unidade lima (5), maibé ekipamentu ne’e ninia kualidade la dura. Tanba  bainhira membru sira uza hodi koko halo destruisaun ba matéria sensitivu, farda sira ne’e ninia kualidade la di’ak tuir estandard internasionál ne’ebé bele próteze ema nia vida.

UEP iha ona membru na’in tolu (3) ne’ebé iha rekursu kualifikadu no hetan formasaun iha Portugál, Xina, Indonézia, Tailándia no Malázia, inklui formasaun iha rai laran kona-ba servisu harahun materiál explozivu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here