Kartaun ATM P24 BNCTL. Imajen TATOLI/Antonia Maia Gusmão.

DILI, 27 janeiru 2020 (TATOLI) – Banku Nasionál Komérsiu Timor-Leste (BNCTL, sigla portugés) integra tiha ona iha sistema P24, maibé nia implementasaun seidauk tanba sei prodús kartaun sira.

“BNCTL ofisialmente integra tiha ona P24 iha novembru 2019, maibé ami seidauk implementa sistema ne’e porsentu 100 tanba kestaun tékniku uitoan, maibé rezolvidu ona”, Prezidente Konsellu Administrasaun BNCTL, Brígido de Sousa, ba TATOLI iha Timor Plaza, ohin.

“Saida maka sei impede BNCTL hodi uza P24 no ninia kliente sira bele uza sistema ne’e hodi asesu ATM banku seluk nian, nune’e mós banku seluk nian bele asesu BNCTL nia ATM sira hodi halo tranzasaun, levantamentu, check balansu, imprime statement, halo transferénsia osan entre banku sira tantu partisipante sira iha P24 ne’e, impedimentu prinsipál maka seidauk iha kartaun P24”, informa.

Brígido hatutan daudaun ne’e imprime hela kartaun débitu sira ho logo P24, empreza ne’ebé prodús hosi Portugál ne’ebé maka ajuda Banku Central Timor-Leste hodi dezenvolve sistema P24.

“Maibé foin daudaun iha kestaun téknika uitoan ne’ebé BNCTL ho empreza ne’e presiza kompleta hodi bele permite sira atu imprime kartaun, tanba iha kartaun ne’e nia laran presiza iha kódigu para sistema ne’e bele rekoñese”, Brígido dehan.

Banku rua ne’ebé integra tiha ona iha sistema ne’e mak BNU no Mandiri, no BRI iha faze preparasaun hodi tama mós.

“Daudaun ne’e ami hein hela kartaun sira ne’e, kuandu mai ami halo teste loos hotu ona, maibé antes atu fahe ba kliente sira ami sei divulga informasaun kona-ba oinsá atu uza, no ami sei husu ba kliente sira atu troka sira-nia kartaun BNCTL tuan ba iha foun no mákina ATM BNCTL nian iha territóriu Timór ne’e, ami bele integra ona ba P24”, katak.

BNCTL planeia hodi imprime kartaun rihun 15 no atu integra uluk ba mákina ATM sira iha munisípiu tanba hatene katak banku estranjeiru sira-nia prezensa barak liu iha Dili, exetu BNU.

Aleinde ne’e, BNCTL sei estabelese tan mákina ATM iha munisípiu hanesan iha Postu Administrativu Maubisse-Ainaro, Maliana-Bobonaro, RAEOA, no iha Dili rasik sei aumenta hitu, iha fatin sira hanesan Colmera, Becora, Fatumeta, iha loja oras 24, iha Kuartél Jenerál F-FDTL nia oin, Kampung Baru, no Taibessi.

Hodi dehan Kliente BNCTL nian ne’ebé uza kartaun débitu hamutuk rihun 40.

Notísia relevante : BNCTL Integra Ona ho P24

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here