Governadór BSTL, Abraão de Vasconselos. Foto/Jorgerjo Guterres.

DILI, 05 dezembru 2019 (TATOLI) – Governadór Banco Central de Timor-Leste (BCTL), Abraão de Vasconselos, informa Banku Nasionál Komérsiu Timor-Leste (BNCTL, sigla portugés) daudaun integra ona iha sistema eletróniku P24.

“BNCTL conect tiha ona ho sistema ne’e, sira-nia mákina ATM balun conect tiha ona ho P24″, hateten Abraão de Vasconcelos ba TATOLI, segunda (02/12).

Tanba ne’e, Abraão husu ba kliente BNCTL katak hakarak asesu ba rede P24 ho kartaun BNCTL tenke bá troka ho kartaun BNCTL nian ne’ebé maka iha logo P24.

“Kuandu iha ona kartaun ATM ho logo P24 bele uza iha mákina ATM BNU no Mandiri. Parese sira seidauk anunsia ba públiku, maibé agora daudaun BNCTL maka banku ida ba datoluk maka iha ona rede P24, hela de’it BRI mak atu tuirmai”, katak.

Dirijente másimu BCTL ne’e rekoñese katak sei iha difikuldade barak bainhira populasaun sira atu asesu ba iha sistema eletrónika.

“Mas sistema ida dezeña maka razaun Banku Sentrál halo mandatóriu ida ba fornesedór sira hanesan produtu ida hosi Telemor mak Mosan, no mós hosi Telekomcel ninian, ida ne’e atu integra iha bankária nian, iha rede P24. Ida ne’e para aban-bainrua kliente BNCTL nian hanesan idozu ida kuandu simu osan iha ninia postu administrativu la presiza to’o mai munisípiu hodi foti osan maibé kuandu Telemor nia sukursál iha postu iha, bele foti osan hosi konta bankária”, katak.

Maibé, Governadór dehan sistema ne’e seidauk implementa no planeia iha 2020.

BCTL lansa tiha ona iha 18 dezembru 2018 pagamentu nasionál switch, servisu foun ida ne’e, koñesidu ho P24, ne’ebé permite indivíduu sira ho kualkér kartaun bankária (débitu ka kréditu) atu halo tranzasaun sira liuhusi kualkér kaixa automátika (ATM) ka dispozitivu Pontu de Venda (POS) iha Timor-Leste.

Sistema ne’e konekta ho karteira eletrónika ho baze telefone hodi permite tranzasaun sira husi karteira eletrónika-ba-karteira eletrónika no husi karteira eletrónika-ba-konta bankária no vise-versa.

Iha lansamentu ne’e, ba faze dahuluk BNU no Banku Mandiri mak konektadu hodi posibilita kliente sira husi kada banku uza ATM husi banku seluk.

Antes ne’e, Prezidente Konsellu Administrasaun BNCTL, Brígido de Sousa, hatete BNCTL iha planu hamutuk ho banku seluk atu enkaixa sistema ida ne’ebé BCTL prepara hela hanesan P24.

“Ne’e signifika katak karik BNCTL iha ATM barak liu iha fatin hothotu, entaun kliente banku seluk bele uza fasilidade BNCTL nian, maski sira-nia banku rasik iha munisípiu iha, maibé sira mós bele uza’’,  Brígido de Sousa dehan iha Timor Plaza, tersa (16/06/).

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here