Diretór Jerál Arte no Kultura, Manuel Ximenes Smith. Imajen: Nelia Fernandes

DILI, 22 janeiru 2020 (TATOLI)-Diretór Jerál Arte no Kultura, Manuel Smith hateten, Orsamentu duodésimu ne’ebé Ministériu Finansa aloka ba Sekretáriu Arte no Kultura (SEAK) ho nia montante hamutuk $145,837.

“Orsamentu Sekretáriu Estadu Arte no Kultura ba iha 2020, tama iha programa duodésimu ne’ebé Ministériu Finansa aloka orsamentu ho totál $145,837,” dehan Diretór Jerál Arte no Kultura, Manuel Smith, ba Agência TATOLI iha nia knaar fatin, Avenida Portugal, Dili, kuarta (22/1/2020).

Nia hatutan, orsamentu refere sei aloka ba saláriu vensimentu ho totál hamutuk $43,796 no Bens Serbisu totál $83, 541, transferénsia públika totál $3,500 no kapitál dezenvolvimentu totál hamutuk $15, 000.

“Alokasaun orsamentu ida ne’e normál. Ita haree kuandu kestaun orsamentu tama duodésimu ne’e sempre akontese hanesan ne’e,” nia dehan.

Nia esplika, orsamentu duodésimu ne’e afeta ba atividade lubuk ida tanba husi janeiru no fevereiru ne’e SEAK seidauk implementa atividade normál.

Tanba, nia dehan, sei foka liu ba programa ki’ikoan hanesan bens no serbisu, kontratasaun ba funsionáriu kazuál sira no mós ba termu sertu sira ne’eba atividade ne’e mak normál hanesan atividade ki’ikoan sira hanesan viajen lokál ba iha munisipiu no pagamentu ba jornais sira.

Nia dehan, ho orsamentu duodésimu mak atividade boot sira seida’uk implementa tanba planu asaun anual Sekretáriu Estadu Arte no Kultura (SEAK) liuhusi dirasaun nasionál sira kona-ba planu atividade.

“Ezemplu, ita halo festivál nasionál Arte Kultura ne’ebé sei hala’o iha Munisipiu Lospalos, sei hala’o iha 14 fulan outubru tanba, loron 14 outubru ne’e sai nu’udar loron nasionál kultura,” nia hateten.

Aleinde ne’e, nia haktuir, atividade sensibilizasaun no atividade levantamentu dadus sira ne’e labele realiza tanba haree ba kestaun orsamentu duodésimu.

Iha parte seluk, nia informa, sei la ezekuta programa ne’ebé bo’ot tanba iha osan duodésimu ne’e iha kriteria forte balun ne’ebé husi Ministériu Finansa haruka atu utiliza osan duodésimu ne’e.

“Ita hatene katak, ita sei la ezekuta programa foun. Ita sei hatutan programa ne’ebé mak 2019 ne’ebé mak nia kontinuasaun 2020, ne’e mak ita sei la’o,” nia hateten.

Orsamentu duodésimu ne’e, nia hateten, afeta maka’as ba serbisu tanba ninia fundamentu mak kapitál dezenvolvimentu ho osan total $180.000 atu reabilita antigu-prizaun Aipelo, osan ne’e ita la ezekuta iha 2019 mak reapropriu mai fali 2020.

“Ne’e signifika katak la’os programa foun. Ne’e programa tuan ne’ebé realoka husi 2019 mai 2020. Entaun, ida ne’e sai hanesan problema uitoan, Espera katak orsamentu bele fila fali normál, para ita bele ezekuta planu hirak ne’e,”  nia esplika.

Notísia relevante:SEAK Halo Ona Levantamentu Dadus Iha Baucau No Ermera

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here