Ministru Justisa, Manuel Cárceres da Costa. Imajen/Egas Cristovão

DILI, 22 janeiru 2020 (TATOLI)-Ministériu Justisa (MJ) simu ona Dotasaun Orsamentu Temporáriu (DOT) duodesimu husi Ministériu Finansas (MF) hamutuk milaun $1-resin hodi ezekuta ba fulan janeiru 2020.

Notísia Relevante : 2020, MJ Hadi’a Jestaun Institusionál ho Boa Governasaun

Husi montante orsamentu duodesimu nian ne’e sei aloka ba saláriu vensimentu no bens servisu. Ministru Justisa, Manuel Cárceres da Costa, hateten, maske ho limitasaun orsamentu iha fulan ne’e ba nesesidade ministériu nian, maibé sei la fó impaktu ba servisu administrasaun no atendimentu públiku hanesan ba servisu notariadu nian hodi emite pasaporte, kartaun billete identidade no sira seluk tan.

“Funsionamentu ministériu nian sei la’o normal,”  hateten Ministru Manuel Cárceres da Costa, hodi responde Ajénsia TATOLI, ohin, iha Palacio do Governo, Dili.

Nia dehan, implikasaun duodesimu mak programa foun ne’ebé trasa ona labele realiza. Ezemplu, programa formasaun ba majistratura, no programa foun sira ne’ebé trasa ona. Nune’e, nia hein katak, tempu balun OJE 2020 bele aprova para asegura servisu Estadu nian ba povu nia moris di’ak.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here